މި މައްސަލަ އާ ގުޅިގެން ހައްޔަރުކޮށްފައިވަނީ ކުއްޖާގެ މަންމަ ކަމަށް ތުހުމަތު ކުރެވޭ އުމުރުން 30 އަހަރުގެ ސްރީލަންކާ އަންހެނެކެވެ.
މި މީހާ އިއްޔެ ހަވީރުގެ ވަގުތެއްގައި ކޯޓު އަމުރެއްގެ ދަށުން ހައްޔަރުކުރީ، ވެލާނާ އިންޓަނޭޝަނަލް އެއާޕޯޓު (ވީއައިއޭ) ގައި ލަންކާއަށް ފުރަން ގޮސް ހުއްޓަ އެވެ.
ފުލުހުން ބުނީ އެ މައްސަލަ އާ ގުޅިގެން ހައްޔަރު ކުރި މީހާގެ ބަންދާ މެދު ގޮތެއް ނިންމުމަށް ކޯޓަށް ހާޒިރު ކުރުމުން ޝަރީއަތް ނިމެންދެން ބަންދު ކުރުމަށް ކޯޓުން އަމުރު ކޮށްފައިވާ ކަމަށެވެ.
މި ހާދިސާގެ މައުލޫމާތު އެ ފަރާތަށް ލިބިފައިވަނީ އިއްޔެ ހެނދުނު 9:20 ހާއިރު ކަމަށް ފުލުހުންގެ މީޑިއާ އޮފިޝަލް ވަނީ ވިދާޅުވެފަ އެވެ. އަދި އޭރު އެ ކުއްޖާ މަރުވެފައިވާ ކަމަށް ކުއްޖާ ބެލި ޑޮކްޓަރާ ހަވާލާދީ ފުލުހުން ބުނެފައިވެ އެވެ.
މި މައްސަލަ އާ ގުޅިގެން ތަހުގީގަށް ފުލުހުންގެ ޓީމެއްވެސް އިއްޔެ ވަނީ އެ ރަށަށް ގޮސްފަ އެވެ.
"ސީއެންއެމް" އަށް މައުލޫމާތު ލިބިފައިވާ ގޮތުގައި އެއްލާލާފައި އޮތީ ދިގުރަށުގައި ހުންނަ ގެސްޓްހައުސްއެއްގައި މަސައްކަތް ކުރާ އަންހެނަކު ވިހެއި ކުއްޖެކެވެ. އަދި ފޫޅުވެސް ނުކަނޑާ އޮތް އެ ކުއްޖާ އޮތީ ކުނި އުކަން ބޭނުންކުރާ ކަޅު ކޮތަޅެއްގެ ތެރޭގައި ކަމަށް މައުލޫމާތު ލިބިފައިވެ އެވެ.
