މިހާރު އަމަލުކުރަމުންދާ ކުންފުންޏާ ބެހޭ ގާނޫނަކީ މީގެ 26 އަހަރު ކުރިން -- ޖުލައި 1، 1997 އިން ފެށިގެން އަމަލުކުރަމުންދާ ޒަމާނީ އުސޫލުތައް އެއްގޮތަކަށްވެސް ގާނޫނެކެވެ.
ކުންފުންޏާ ބެހޭ ޒަމާނީ ބިލެއް މަޖިލީހަށް ހުށަހެޅުއްވީ އެމްޑީޕީއަށް ނިސްބަތްވާ ދުވާފަރު ދާއިރާގެ މެންބަރު އިސްމާއީލް އަހްމަދު އެވެ.
އެ ބިލަށް ވޯޓަށް އެހުމުން، ފާސްކުރަން ފެންނަ ކަމަށް 53 މެމްބަރުން ވޯޓު ދިނެވެ. ނުފެންނަ ކަމަށް ވޯޓު ދިނީ އެންމެ މެމްބަރެކެވެ. އެ ބިލު ފާސްކުރުމާއެކު، ތަސްދީގުކުރުމަށް ރައީސުލްމްހޫރިއްޔާއަށް ފޮނުވާނެ އެވެ.
މިހާރު އަމަލުކުރަމުންދާ ގާނޫނުގައި 104 މާއްދާ އޮތް ނަމަވެސް މިއަދު ފާސްކުރި ބިލްގައި 248 މާއްދާ ހިމެނެ އެވެ. މި ބިލުގައި ދިވެހިރާއްޖޭގައި ކުންފުނި އުފެއްދުމާއި ރަޖިސްޓަރީކުރުމާއި ހިންގުމާއި، އުވާލުމުގެ ހަމަތަކާއި، ކުންފުނިތަކާ ބެހޭ ގޮތުން ދިވެހިރާއްޖޭގައި އަމަލުކުރެވޭނެ އެނޫންވެސް އުސޫލުތަކާއި އިޖުރާއަތުތައް ބަޔާންކުރާ ބިލެކެވެ.
މީގެ ތެރެއިން ލޯކަލް އޮތޯރިޓީ ކުންފުނިތަކުގެ ބޭނުމަކީ ރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގައި، ކައުންސިލުތަކަށް ވިޔަފާރި ކުރެވޭނެ މަގު ތަނަސްކުރުމަށް އަމިއްލައަށް ކުންފުނި އުފައްދައިގެން ވިޔަފާރި ކުރެވޭނެ މަގު ތަނަވަސްކޮށްދިނުމެވެ.
މަޖިލީހުގެ އިއްޔެގެ ޖަލްސާގައި ވެސް ބިލުގެ ވޯޓަށް އަހަން މަސައްކަތްކުރި އެވެ. ނަމަވެސް ކޯރަމް ހަމަނުވާތީ ވޯޓަށް އެހިފައެއް ނުވެ އެވެ.
