ފަޒުލް މިކަން ހާމަކުރައްވާފައި ވަނީ ނޫސްވެރިންނަށް މައުލޫމާތު ދެއްވުމަށް އާބަންކޯގެ އެގްޒިބިޝަން ސެންޓަރުގައި މިހާރު ކުރިއަށްދާ ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުންނެވެ.
ރައީސް މުއިއްޒު އިއްޔެ ވަނީ ހިޔާ ފްލެޓުތަކުގެ މަސައްކަތް ނިންމުމަށް އަމިއްލަ ފަރުދުންގެ އަތުން އާންމުކޮށް ދެ ލައްކަ ރުފިޔާ ހަރަދުވެފައިވާ ކަމަށް ކަނޑައަޅައި، ފްލެޓުތަކުގެ އަގުން ދެ ލައްކަ ރުފިޔާއަށްވާ މިންވަރު އުނިކޮށްދެއްވަން ނިންމަވާފައިވާކަން ހާމަކުރައްވާފަ އެވެ. އެގޮތުން ވަޒީރުންގެ މަޖިލީހުގެ މަޝްވަރާއަށްފަހު، މިހާރު ހަދާފައިވާ ހަތް އަހަރު ދުވަހުގެ އެއްބަސްވުމުގައިވާ މަހަކު 5,300 ރުފިޔާގެ ކުލި، މަހަކު 3,984 ރުފިޔާ 21 ލާރިއަށް ކުޑަކޮށްދެއްވުމަށް ނިންމަވާފައިވާކަން ރައީސް ވަނީ ވިދާޅުވެފަ އެވެ.
އެ ނިންމެވުމާ ގުޅޭގޮތުން ފަޒުލް ވިދާޅުވެފައި ވަނީ ތިން ހާސް ރުފިޔާއަކީ މެއިންޓެނެންސް ފީ ނުލައި ކުއްޔަށް ހިނގާ ފައިސާގެ އަދަދު ކަމަށެވެ. އެ އަދަދަށް ފައިސާ ދައްކަން ޖެހޭނީ އަންނަ މަހުން ފެށިގެން ކަމަށް ފަޒުލް ވިދާޅުވި އެވެ. އޭނާ ވިދާޅުވި ގޮތުގައި ކުލި ކުޑަކުރި ކަމުގައި ވީނަމަވެސް ދެ ލައްކަ ރުފިޔާ ހަމަނުވާ ކަމަށާއި ހަތް އަހަރު ދުވަހުން ކުޑަވާ ކުލިން ހަމަވަނީ އެއް ލައްކަ ރުފިޔާ ކަމަށް ބުނެ ވާހަކަ ދެކެވެމުން އަންނަ ކަމުގަ އެވެ.
ފަޒުލް ވިދާޅުވީ މި ނިންމުމަކީ ހިޔާ ފްލެޓުތަކުގައި ދިރިއުޅެމުން އަންނަ ފަރާތްތަކަށް ލިބޭނެ އިތުރު ލުޔެއް ކަމަށެވެ. ހިޔާ ފްލެޓުތަކުގެ ފިނިޝިންއަށް ކުރި ހޭދައަށް ބަލައި، ދެ ލައްކަ ރުފިޔާ ދިނުމަކީ ރައީސް މުއިއްޒު ވެވަޑައިގެންނެވި ރިޔާސީ ވައުދެކެވެ.
ރައީސް ވަނީ ރަށްރަށުގައި ހަދާފައިވާ ފްލެޓުތަކާއި ވިނަރެސް ފްލެޓުތަކުގެ ކުއްޔާއި ޑައުންޕޭމަންޓަށް ބޮޑު ލުޔެއް ދިނުމަށް ނިންމަވާފައިވާކަން އިއްޔެ ހާމަކުރައްވާފަ އެވެ. އޭގެ އިތުރުން ހުޅުމާލެ ފުރަތަމަ ފިޔަވަހީގައި ހުރި ފްލެޓުތަކުގެ ކުއްޔާއި އަދި އެހެން ސޯޝަލް ހައުސިން ޔުނިޓުތަކުގެ ކުލި ދެއްކުމުގައި ދަތިތަކާ ކުރިމަތިލާން ޖެހިފައިވާ ރައްޔިތުންނަށް، ކުލި ދެއްކުމުގައި ފަސޭހަ އިންތިޒާމުތަކެއް ހަމަޖައްސައި ދިނުމަށް ނިންމަވާފައިވާ ކަމަށް ވެސް ރައީސް ވަނީ ވިދާޅުވެފަ އެވެ.
