މަލީހު ވިދާޅުވީ ވެރިކަމަށް މަސްދުވަސް ވުމާ ގާތްވެފައިވާއިރު، ރައީސް ޔާމީން އަދިވެސް ހުންނެވީ ދައުލަތުގެ އަނިޔާގައި ކަމަށެވެ. އެމަނިކުފާނުގެ މައްޗަށް ކޮށްފައި އޮތީ ހަރާމް ހުކުމެއް ކަމަށް އަދުގެ ސަރުކާރުގެ އިސްވެރިން އޭރު ކެމްޕެއިނުގައި ވިދާޅުވަމުން ދިޔަ ނަމަވެސް، ވެރިކަން ލިބުމުން އެމަނިކުފާނު އެކަހެރި ކުރައްވާފައިވާ ކަމަށް މަލީހު ވިދާޅުވި އެވެ. އަދި މިއީ އިންސާފުތޯ މަލީހު ވަނީ ސުވާލު އުފައްދަވާފަ އެވެ.
މަލީހު ފާހަގަވެފައިވަނީ ރައީސް މުއިއްޒު އާއި ރައީސް ޔާމީންގެ ގުޅުންތައް ހީނަރުވި ފަހުން ރައީސް ޔާމީނުގެ ދިފާއުގައި އެންމެ ބޮޑަށް ވަކާލާތު ކުރައްވާ ބޭފުޅެއްގެ ގޮތުގަ އެވެ.
ރައީސް މުއިއްޒުގެ ކެމްޕެއިނުގައި ޕީީޕީއެމް/ޕީއެންސީ ކޯލިޝަނުން ވަނީ ރައީސް ޔާމީންގެ ނަމާއި ފޮޓޯތައް އެކި ގޮތްގޮތުން ބޭނުންކޮށްފަ އެވެ. އެގޮތުން ކެމްޕެއިނު ޕޯސްޓަރުތަކުގެ މެދުގައި ރައީީސް ޔާމީނުގެ ފޮޓޯ ބޭނުން ކުރުމާއި، ޖަލްސާތަކުގައި އެމަނިކުފާނުގެ ނަން ޖަހާފައި ހުސް ގޮނޑި ބެހެއްޓި އެވެ. އަދި ވެރިކަމަށް އާދެވިއްޖެ ނަމަ އެންމެ އިސްކަމެއް ދީގެން ކުރާނެ އެއް ކަމަކީ އެމަނިކުފާނު މިނިވަންކުރުން ކަމުގައިވެސް އޭރު ބުނަމުން ދިޔަ އެވެ.
ނަމަވެސް ރައީސް މުއިއްޒުގެ ވެރިކަމަށް އިންތިހާބުވުމާ އެކު ކަންކަން ބަދަލުވާން ފަށައި، ޕީޕީއެމްގެ ލީޑާޝިޕާއި ރައީސް ޔާމީން އާ ދެމެދު ވަނީ ހިޔާލު ތަފާތުވުންތަކާއި މައްސަލަތައް އުފެދިފަ އެވެ. ނަތީޖާއެއްގެ ގޮތުން ރައީސް ޔާމީން ވަނީ ޕީޕީއެމުން ވަކިވެވަޑައިގެން، އެމަނިކުފާނު އިސްވެ ހުންނަވާ ޕީއެންއެފްގެ ނަމުގައި އާ ޕާޓީއެއް އުފައްދަވާފަ އެވެ.
