މި މަޝްވަރާތައް ކުރައްވާފައިވަނީ އެމެރިކާގެ ސެކެޓްރީ އޮފް ސްޓޭޓް އެންޓޮނީ ބްލިންކަން ވަޒީރަށް ފޯނުން ގުޅުއްވައި އިއްޔެ ދެއްކެވި ވާހަކަފުޅުގަ އެވެ.
މިނިސްޓަރު ޒަމީރާއި ސެކްރެޓަރީ ބްލިންކެންގެ ފޯނު ކޯލުގައި، ދެ ގައުމުގެ ގުޅުން ވަރުގަދަ ކުރުމާއި ގުޅޭ ގޮތުން ވާހަކަ ދެއްކެވި އެވެ. އެގޮތުން އަސްކަރީ ގުޅުމާއި، އިގުތިސާދީ، މޫސުމަށް އަންނަ ބަދަލުތަކަށް އަހުލުވެރިވުމާއި ހެޔޮވެރިކަން އަދި ޑިމޮކްރަސީ ކުރިއެރުވުމާ ގުޅޭ ގޮތުން ދެ ވަޒީރުން މަޝްވަރާ ކުރެއްވި ކަމަށް ފޮރިން މިނިސްޓްރީން ބުނެ އެވެ.
ރާއްޖެއާއެކު އޮންނަނީ ވަރަށް މުހިއްމު ގުޅުމެއްކަން ފާހަގަ ކުރައްވައި ބްލިންކެން ވިދާޅުވީ ކުރިއަށް އޮތް ތަނުގައި ވެސް އެ ގުޅުން ދެމެހެއްޓުމަށް އެމެރިކާއިން މަސައްކަތް ކުރާނެކަމުގެ ޔަގީންކަން ރައީސް މުއިއްޒުގެ އެޑްމިނިސްޓްރޭޝަނަށް ދެއްވާ ކަމަށެވެ.
އެމެރިކާއަށް ފުރިހަމަ އެއްބާރުލުން ލިބިގެންދާނެކަމުގެ ޔަގީންކަން މިނިސްޓަރު ޒަމީރާ ވަނީ ބްލިންކަންއަށް ދެއްވާފަ އެވެ.
