ދުބާއީ މެރަތަންއަށް ދިޔަ ދިވެހި ޓީމުގައި ޖުމްލަ 14 ދުވުންތެރިން ބައިވެރިވެއެވެ. އޭގެ ތެރެއިން 10 މީހުންނަކީ ފުލް މެރަތަން ދުވާ މީހުންނެވެ. ތިން މީހަކު ދުވާނީ 10 ކިލޯމީޓަރު ކެޓަގަރީގައެވެ. ދެން ކުޅުދުއްފުށީ ޓީމާއެކު ބައިވެރިވަނީ ކޯޗު ޝުޖާއެވެ.
މި އެންމެންވެސް އަންނަނީ މިދިޔަ އަހަރުގެ ޖުލައިން ފެށިގެން މެރަތަންއަށް ތައްޔާރުވަމުންނެވެ. މި ޓީމު ތައްޔާރުކޮށްދިނުމުގައި އެންމެ އިސް ދައުރެއް އަދާކުރި މީހަކީ، އައިރަނަރސްގެ ކޯޗު ޝުޖާއުއެވެ.
މި ޓީމު ލީޑުކުރަނީ ކުރިން ނިއުރޭޑިއަންޓް ސްޕޯޓްސް ކްލަބުގެ އޮފިޝަލެއްގެ ގޮތުގައި މަސައްކަތް ކުރި ހދ. ކުޅުދުއްފުށީ ޒުވާނެއް ކަމަށްވާ އަބްދުއްރަޝީދު ސައީދު- އަބްސީއެވެ. ދުބާއީގައި ހުރެ އަބްސީ ކިޔައިދިން ގޮތުގައި، މިއީ ރަށުގައި އެކުގައި ދުވަން ދާން ފެށި ގްރޫޕެއްގެ ތެރެއިން އުފަން ވެގެން އައި ހިޔާލެކެވެ.
ކުޅުދުއްފުށިން ދުބާއީ މެރަތަންގައި މާދަމާ ދުވާ ބައިވެރިން މިދިޔަ ހަފްތާގައިވަނީ ދުބާއީއަށް ގޮސްފައެވެ. ކުޅުއްދުއްފުށީ ޓީމުން މިހާރުވަނީ، ޕިން ސްޕޯޓްސް އެންޑް ރެކްރިއޭޝަންގެ ނަމުގައި ދުވުންތެރިންގެ ކްލަބު ރަޖިސްޓްރީވެސް ކޮށްފައެވެ.
އަބްސީވަނީ، މި މެރަތަންގައި ބައިވެރިވުމަށް އެކި ގޮތްގޮތުން އެހީތެރިވެ ދިން ފަރާތްތަކަށް ޝުކުރު އަދާކޮށްފައެވެ. ވަކިން ހާއްސަކޮށް މެއިން ސްޕޮންސަރ ކުޅުދުއްފުށީ އޯބީ ޝޮޕް އަބްސީ ފާހަގަ ކުރިއެވެ.
