ގުޖުރާތުގެ ސީޕްލޭން ދަތުރުތަކަކީ ރާއްޖޭގެ އެހީގައި އިންޑިޔާގައި ފެށި ފުރަތަމަ ސީޕްލޭން ދަތުރުތަކެވެ. މި ހިދުމަތަކީ 2020 ވަނަ އަހަރުގައި ދިވެހި ގައުމީ އެއާލައިނުން ސީޕްލޭންއެއް ކުއްޔައް ނަގައިގެން ދޭންފެށި ހިދުމަތެކެވެ.
މީގެ ކުރިން ގުޖުރާތު ސްޓޭޓުގެ ގާނޫނު ހަދާ މަޖިލީހުގައި ސީޕްލޭންގެ ހިދުމަތާ ބެހޭ ގޮތުން ބީޖޭޕީގެ މެމްބަރު ހަރްޝާދު ޕަޓޭލް ކުރި ސުވާލަކަށް ރައްދު ދެއްވައި އިންޑިޔާގެ ސަރުކާރުން ވަނީ ސީޕްލޭން ލޯންޗު ކުރަން ރާވާފައިވާ ކަމަށާއި ފުރިހަމަ ކުރަން ހުރި ކަންކަން ފުރިހަމަކޮށް ނިމުނުހާ އަވަހަކަށް އަލުން ހިދުމަތް ދޭން ފަށާނެ ކަމަށް ބުނެފައެވެ.
މި ނިންމުން ބަދަލުކޮށް ގުޖުރާތު ސަރުކާރުން އިއްޔެ ބުނެފައިވާ ގޮތުގައި ހިންގުމުގެ ހަރަދު ބޮޑުވުމުގެ ސަބަބުން އެ އޮޕަރޭޝަން ވަނީ ހުއްޓާލާފައެވެ. މަޖިލީހުގައި އެ ސަރުކާރުން އިއުތިރާފުވެފައި ވާ ގޮތުގައި ސީޕްލޭން އޮޕަރޭޝަނަށް މިހާތަނަށް 13.15 ކްރޯޑަށް ވުރެ ގިނަ އިންޑިއަން ރުޕީސް ހަރަދުކޮށްފައިވެ އެވެ.
މީގެ އިތުރުން އެ ސަރުކާރުން ބުނެފައިވަނީ އެ ހިދުމަތް މެދުކަނޑާލާފައި ވަނީ ބޭރުގައި ރަޖިސްޓްރީކޮށްފައިވާ މަތިންދާބޯޓުތަކުގެ ސަބަބުން އޮޕަރޭޝަނާއި މެއިންޓެނެންސްއަށް ދަތިތަކެއް ހުރުމުން ކަމަށެވެ.
އަދިވެސް އެ ސަރުކާރުން ބުނެފައިވާ ގޮތުގައި އަހްމަދުއާބާދުން ކެވަޑިއާއަށް ސީޕްލޭންގެ ހިދުމަތް 2020 ވަނަ އަހަރު ދޭން ފެށީ 13.15 މިލިއަން އިންޑިއަން ރުޕީސް ހަރަދުކޮށްގެން ކަމަށާއި 2021 ވަނަ އަހަރު ސީޕްލޭންގެ ހިދުމަތް މެދުކަނޑާލީ މާލީ ސަބަބުތަކާ ހުރެ ކަމަށެވެ. އަދި މީހެ އިތުރުން އޮޕަރޭޓަރަށް ކުރަން ޖެހޭ އަގު ބޮޑުވުމުން ކަމަށް ވެސް އެ ސަރުކާރުން ބުނެފައިވެއެވެ. އެ ސަރުކާރުން މިފަދައިން ބުނެފައިވަނީ ކޮންގްރެސް ޕާޓީގެ ލީޑަރު އަރުޖުން މޯދުވާޑިއާ ކުރެއްވި ސުވާލަކާއި ގުޅިގެންނެވެ.
އިންޑިޔާ އަދި ރާއްޖެ އާއި ދެމެދު އޮތް ރަހުމަތްތެރިކަމުގެ ގުޅުން ދުވަހެއް ދުވަހެއް ހީނަރުވަމުން ދާއިރު މިކަން ގުޖުރާތުން ހާމަކޮށްފައި ވަނީ އިއްޔެއެވެ.
