އެމްޑީޕީއާއި، އެ ޕާޓީގެ ލީޑަޝިޕުން ވަކިވި ބައެއް މެންބަރުންގެ މައްޗަށް އުފެއްދި ޑިމޮކްރަޓްސްއިން މިއަދު ބޭއްވި ނޫސްވެރިންގެ ބައްދަލުވުމުގައި ފައްޔާޒު ވިދާޅުވީ، އެ ދެ ޕާޓީން މިވަގުތު ކުރަމުންދަނީ މަޖިލިސް މެދުވެރިކޮށް ސަރުކާރާއި ގައުމު ހަމަ މަގަށް އެޅުވުމުގެ މަސައްކަތް ކަމަށެވެ.
ފައްޔާޒު ވިދާޅުވީ ދެ ޕާޓީގެ ދެމެދުގައި ހުރި ހިޔާލު ތަފާތުވުންތައް އަދިވެސް އެބަހުރި ކަމަށާއި، ކުރިއަށް އޮތް މަޖިލިސް އިންތިހާބުގައި ދެ ޕާޓީ ގުޅިގެން ވާދަކުރުމަށް ނިންމާފައި ނުވާކަމަށެވެ.
މީގެއިތުރުން 20 ވަނަ މަޖިލިސް އެކުލަވާލެވިގެން އަންނަ ގޮތަށް ބަލައި ދެ ޕާޓީން އެކުގައި ސިޔާސީ މަސައްކަތް ކުރުމާމެދު ގޮތް ނިންމާނީ އެއިރެއްގެ ހާލަތުގެ މައްޗަށް ރިއާޔަތްކޮށް ކަމަށް ފައްޔާޒު ވިދާޅުވި އެވެ.
ރައްޔިތުންގެ މަޖިލިހުގެ މެމްބަރުންގެ އަދަދާއި ސިޔާސީ މަގާމުތައް ކޮންޓްރޯލް ކުރަން ގާނޫނު އަސާސީ އަށް ބަދަލުގެންނަން އެމްޑީޕީ އާއި ޑިމޮކްރެޓްސްއިން މިހާރު ވަނީ އެއްބަސްވެފަ އެވެ.
އަދި އިންތިހާބާ ބެހޭ ގާނޫނަށް ވެސް އިސްލާހު ގެންނަން ނިންމައި، އެ މަސައްކަތްތަކަށް ދައުރުން ބޭރުގައި މަޖިލިހުގެ ޖަލްސާއެއް ބޭއްވުމަށް ހުށަހަޅާފައި ވާ ކަމަށް ދެ ޕާޓީން މައުލޫމާތުދެ އެވެ.