ކޮވިޑް19 އާއި ގުޅިގެން އިސްލާމިކް މިނިސްޓްރީން ކުރިއަށްގެންދާ ދީނީ މައުލޫމާތު ދިނުމުގެ ޕްރޮގްރާމުގައި ވާހަކަ ދައްކަވަމުން ޝޭހް އިލްޔާސް ވިދާޅުވީ މި ފަދަ ދަނޑިވަޅުތަކުގައިވެސް ސަބަބުތަކުގައި ހިފަން ޖެހޭކަމަށެވެ. އަދި އާންމު ދިރިއުޅުމުގައިވެސް ސަބަބުތަކުގައި ހިފަން ޖެހޭކަމަށާއި އެއީ ވަކީލު ކުރުމާ ހިލާފުވުމެއް ނޫންކަމަށް އިލްޔާސް ވިދާޅުވިއެވެ. އަދި އެ ކަމަކީ އިސްލާމްދިން ބާރު އަޅާކަމެއް ކަމަށެވެ.
އިލިޔާސް ވިދާޅުވީ މި ދަނޑިވަޅުގައި މުޅި ދުނިޔެ ވަނީ ހާސްކަމެއްގެ ތެރޭގައިކަމަށްވާއިރު އެންމެ ބޭނުންވަނީ ބަލި މަޑުކަމުން އަރައިގަތުންކަމަށާއި އެހެންކަމުން ސަލާމަތްވުމަށް ބޭނުންވާ ވަސީލަތުގައި ހިފަން ޖެހޭކަމަށެވެ. އަދި މާއްދީ ގޮތުންވެސް ސަބަބުގައި ހިފަންޖޭކަމަށްވާއިރު ކަމާ ގުޅޭ އިދާރާތަކުން ދޭ އިރުޝާދުތަކަށް ތަބާވާން ޖެހޭކަމަށްވެސް އިލްޔާސްގެ ވާހަކައިގައި ފާހަގަކުރެއްވި އެވެ.
ބަލި މަޑުކަމުން އަރައިގަތުމަށް މިފަދަ ދަނޑިވަޅުގައި އެންމެ ގަބޫލުކުރާ ދެ ކަމަކީ ސާފުތާހިރުވުމާއި، ގައިގޯޅި ނުވެ ގޭގައި މަޑުކުރުންކަމަށްވާއިރު ސަލާމަތްވުމަށް އެދެ ސަބަބުގައި ހިފަންޖޭކަމަށެވެ.
މީގެ އިތުރުން ބަލި މަޑުކަމުން އަރައިގަތުމަށް ކެތްތެރިވުމާއި، ނަމާދުން ވާގި ހޯދުން މުހިންމުކަމަށާއި ނޭދެވޭ ބަސްތަކުން ދުރުވެ ދުއާ ކުރުން މުހިންމުކަމަށެވެ. އަދި ދުއާކުރުމަކީ މުސްލިމުންގެ އެންމެ ވަރުގަދަ ހަތިޔާރުކަމަށް އިލްޔާސް ވިދާޅުވިއެވެ.
