އެޗްޑީސީން މިއަދު ކުރި އިއުލާނެއްގައި ބުނީ، ހުޅުމާލޭ ފުރަތަމަ ފިޔަވަހީގެ ސޯޝަލް ހައުސިން ޔުނިޓް ތަކަށް އިންސްޓޯލްމަންޓްގެ ގޮތުގައި ކޮންމެ މަހަކު ދައްކާ ފައިސާއިން 20 އިންސައްތަ ކުޑަ ކުރަން ނިންމާފައިވާ ކަމަށެވެ.
ފެބްރުއަރީ މަހުގެ އެއްވަނަ ދުވަހުން ފެށިގެން ފްލެޓްތަކުގެ މަހު ކުލި ކުޑަކުރާނެކަން އިއުލާނު ކުރި ނަމަވެސް، ކުއްޔަށް ލުއި ދީފައިވަނީ ފްލެޓްތަކުގެ މެއިންޓަނެސް ފީ ނުހިމެނޭހެން ކަމަށް އެޗްޑީސީން ބުނެފައިވެ އެވެ.
ހުޅުމާލޭ ފުރަތަމަ ފިޔަވަހީގެ ފްލެޓްތަކުގެ ކުލީގެ 20 އިންސައްތަ ކުޑަ ކުރުމަށް ނިންމަވާފައިވާކަން ރައީސް ޑރ. މުހައްމަދު މުއިއްޒު އިއުލާނު ކުރެއްވީ މިމަހުގެ ހަވަނަ ދުވަހުގަ އެވެ. އަދި ކުލިން ކަނޑައިދޭ 20 އިންސައްތަ ސަރުކާރުން މެނޭޖު ކުރާނެ ކަމަށް ވެސް ރައީސް ވިދާޅުވި އެވެ.
ހުޅުމާލޭގެ ދެވަނަ ފިޔަވަހީގެ ފްލެޓްތަކުގެ މަހު ކުއްޔާއި މެއިންޓަނެންސް ފީ ހިމެނޭހެން 3،984 ރުފިޔާއަށް ކުޑަކޮށް، ޖުމްލަ ކުލިން 100،000 ރުފިޔާ ސަރުކާރުން ވަނީ އުނި ކޮށްދީފަ އެވެ.
ހުޅުމާލެ ފުރަތަމަ ފިޔަވަހީގެ ސޯޝަލް ހައުސިން ޔުނިޓްތަކުގެ މަހު ކުލީގެ އަދަދުން ކޮންމެ މަހަކުވެސް 20 އިންސައްތައިގެ ލުޔެއް ދިނުމަކީ ރައީސް ޑރ. މުއިއްޒުގެ ހަފްތާ14ގެ މަގުޗާޓުގައި ހިމަނުއްވާފައިވާ ކަމެކެވެ.
