މި އެއްބަސްވުމުގައި ސޮއިކުރެއްވީ އާރުއޭސީއެލްގެ މެނޭޖިން ޑިރެކްޓަރު އަހުމަދު މުބީން އާއި އެމްއެންޔޫގެ ޗާންސެލަރު ޑރ. އައިޝަތު ޝެހެނާޒް އަހުމަދެވެ.
ރާއްޖޭގެ އެކި ކަންކޮޅުތަކަށް ކާބޯތަކެއްޗާއި އެނޫންވެސް މުހިންމު ވަސީލަތްތައް ފޯރުކޮށްދިނުމުގައި ހުރި ގޮންޖެހުންތައް ދެނެގަތުމަށް ގައުމީ ފެންވަރުގައި ކުރަން ހަމަޖެހިފައިވާ މިދިރާސާ 16 ހަފްތާ ތެރޭގައި ނިންމަން ހަމަޖެހިފައިވާކަމުގައި ރީޖަނަލް އެއާޕޯޓްސް ކޮމްޕެނީ ލިމިޓެޑްގެ މެނޭޖިންގ ޑިރެކްޓަރ އަހުމަދު މުބީން ވިދާޅުވި އެވެ.
އިތުރަށް ވާހަކަ ދައްކަވަމުން އޭނާ ވިދާޅުވީ ރާއްޖެއަކީ ޖަޒީރާ ގައުމަކަށް ވުމާއެކު، އެއްޗެހި އެއްތަނުން އެނެއް ތަނަށް އުފުލުމަށް ޓަކައި ކާގޯގެ ހިދުމަތް ވަރަށް ބޮޑަށް ބޭނުންވާނެ ކަމަށެވެ.
މި ރަސްމިއްޔާތުގައި ވާހަކަފުޅު ދައްކަވަމުން ޑރ. ޝެހެނާޒް ވިދާޅުވީ، މި ދިރާސާގެ މައިގަނޑު މަގުސަދަކީ ރާއްޖޭގެ އެއާކާގޯ އޮޕަރޭޝަނުގެ ހާލަތު ދެނެގަތުން ކަމަށެވެ.
މި ދިރާސާއަށް މައުލޫމާތު ހޯދަނީ ސާވޭއެއް ކޮށްގެން ކަމަށާއި އެކަމަށް ޓަކައި ރާއްޖޭގައި އެއާޕޯޓް ހިމެނޭ ރަށްރަށަށް ޒިޔާރަތްކޮށް ކަމާގުޅޭ ފަރާތްތަކާ މަޝްވާރާކުރާނެ ކަމަށް އޭނާ ވިދާޅުވި އެވެ.
އެ ދިރާސާ 16 ހަފުތާގެ ތެރޭގައި ނިންމާނެ ކަމަށް ވެސް ޑރ. ޝެހެނާޒް ވިދާޅުވި އެވެ.
