މި މައްސަލަ މަޖިލީހަށް ހުށަހެޅުއްވީ ތުޅާދޫ ދާއިރާގެ މެމްބަރު ހިސާން ހުސެއިން އެވެ. ހިސާންގެ މައްސަލައިގައި ބަޔާންކޮށްފައި ވަނީ ހޯމްލޭންޑް މިނިސްޓަރު އަލީ އިހުސާނާއި އިކޮނޮމިކް މިނިސްޓަރު މުހައްމަދު ސައީދު ވަޒީފާއާ ބެހޭ ގާނޫނާ ހިލާފުވެފައިވާ ކަމަށެވެ.

މައްސަލާގައި ހިސާން ވިދާޅުވި ގޮތުގައި ބަންގްލަދޭޝް މީހުންނަށް ދޫކޮށްފައިވާ އެކްޓިވް ވޯކް ޕާމިޓްގެ އަދަދަކީ 139،000 އަށް ވުރެ މަތި ކަމަށް ފޮރިން ލޭބާ ސްޓެޓިސްޓިކްސް އެންޑް އެކްސްޕެޓް ސިސްޓަމް ރިޕޯޓުން ދައްކަ އެވެ.

ވަޒީފާއާ ބެހޭ ގާނޫނުގެ މެންޑޭޓް ހޯމް މިނިސްޓްރީއާއި ހަޔާ އެޑިއުކޭޝަން މިނިސްޓްރީގެ މެދުގައި ބަހައިލުމަކީ ވެސް އޭނާ ތުހުމަތުކުރެއްވި ގާނޫނާ ހިލާފަށް ސަރުކާރުން ކުރި ކަމެކެވެ.

ރާއްޖެ އަށް ބިދޭސީ މަސައްކަތްތެރިން ގެންނަން ކޯޓާ ދޫކުރުމާއި ހުއްދަ ދިނުމާއި އެކަމާ ގުޅިގެން ކުރަން ޖެހޭ ކަންކަން ރާވައި ހިންގުމަކީ ހޯމް ލޭންޑް މިނިސްޓްރީގެ މެންޑޭޓުގައި ހިމެނޭ ކަމެކެވެ. އެކަމަކު ވަޒީފާ އާ ބެހޭ ގާނޫނު ތަންފީޒު ކުރުމަށްޓަކައި ހަދަން ޖެހޭ ގަވައިދުތައް ހެދުން ހިމެނެނީ ހަޔާ އެޑިއުކޭޝަން ލޭބާ އެންޑް ސްކިލްޑް ޑިވަލޮޕްމަންޓުގެ މެންޑޭޓުގަ އެވެ.

އެހެންވެ އެކަން ފާހަގަ ކުރައްވައި ހިސާން ވިދާޅުވީ ވަޒީފާ އާ ބެހޭ ގާނޫނުގައި ކަނޑައެޅިގެން ބަޔާން ކޯށްފައި ނުވާހާ ހިނދަކު އެ ގާނޫނުގެ ދަށުން އަދާ ކުރަން ޖެހޭ މަސްއޫލިއްޔަތެއް ދެ މިނިސްޓްރީ ދެމެދު ބަހާލައިގެން އަދާ ނުކުރެވޭނެ ކަމަށެވެ. އަދި ވަޒީފާ އާ ބެހޭ ކަންތައްތައް އެވަގުތެއްގައި ރެގިއުލޭޓް ކުރުމުގެ މަސްއޫލިއްޔަތު ހަވާލު ކޮށްފައިވާ މިނިސްޓަރަށް ގާނޫނުން ދީފައިވާ ބާރުގެ ބައެއް އެހެން މިނިސްޓްރީއަކަށް ރައީސް އަށް ހަވާލު ނުކުރެވޭނެ ކަމަށް ވެސް ވިދާޅުވި އެވެ.

ހިސާން ހުށަހެޅުއްވި މައްސަލަ އަށް ބަހުސް ކުރުމާ މެދު ގޮތެއް ނިންމަންނެގި ވޯޓުގައި 23 މެންބަރަކު ން ވޯޓު ދެއްވި އެވެ. ނުފެންނަ ކަމަށް ހަ މެންބަރަކު ވޯޓް ދެއްވި އެވެ.