ގެދޮރުވެރިޔާ ފްލެޓް ލިބޭ މީހުންގެ ލިސްޓާ ބެހޭގޮތުން އޭސީސީން ބުނެފައިވަނީ ފްލެޓް ލިބުނު މީހުންގެ ތެރެއިން 59.6 އިންސައްތަ މީހުންނަކީ ޝަރުތު ހަމަނުވާ މީހުން ކަމަށެވެ. އޭގެތެރެއިން މާލޭގައި ދިރިއުޅޭތާ 15 އަހަރުވެފައިވާ ކަމުގެ ސައްހަ ލިޔެކިޔުމެއް ހުށަހަޅާފައި ނުވާ ފަރާތްތަކާއި، ކައުންސިލްތަކުން ދޮގު މައުލޫމާތު ދީފައިވާ މީހުން ވެސް ހިމެނޭ ކަމަށް އޭސީސީން ބުނެ އެވެ.
މިއަދު ރައްޔިތުންގެ މަޖިލިހުގެ ގައުމީ ތަރައްގީ އާއި ތަރިކައާ ބެހޭ ކޮމިޓީގައި އެކަމާ ގުޅޭގޮތުން ވާހަކަދައްކަވަމުން މިނިސްޓަރު ހައިދަރު ވިދާޅުވީ ފްލެޓަށް ކުރިމަތިލާއިރު ދޮގު މައުލޫމާތު ދީފައިވާނަމަ، އެއްބަސްވުން ބާތިލުކުރެވޭނެކަން މައުލޫމާތު ހުށަހަޅާއިރު ވެސް އެންގެން އޮންނާނެ ކަމަށެވެ.
މިނިސްޓަރު އިތުރަށް ވިދާޅުވީ ގެދޮރުވެރިޔާ ޕޯޓަލްގެ އެކްސެސް އޭސީސީން މިނިސްޓްރީއަށް ހަވާލުކުރުމުން، ފެށޭ ހަފްތާގައި ފްލެޓް ހަވާލުކުރާނެ ކަމަށެވެ. އަދި ނުހައްގުން ފްލެޓް ލިބެން އުޅޭ ނަމަ އެކަން ރަނގަޅު ކުރުމުގެ ފުރުސަތު ލިބެންވާނެ ކަމަށް މިނިސްޓަރު ވިދާޅުވި އެވެ.
ގެދޮރުވެރިޔާ ސްކީމުގެ ދަށުން މާލެ ސަރަހައްދުން ދޫކުރުމަށް ކަނޑައަޅާފައިވާ ފްލެޓް ތަކުގެ ލިސްޓާއި ގުޅޭގޮތުން އޭސީސީން ކުރަމުން ގެންދާ ތަހުގީގުގެ ފުރަތަމަ މަރުހަލާ ނިންމައި، އެ ކޮމިޝަނުގެ ހޯދުންތައް ހައުސިން މިނިސްޓްރީއާ ހިއްސާކޮށްފައިވާ ކަމަށް އެ މިނިސްޓްރީން ވަނީ ބުނެފަ އެވެ. އަދި ތަހުގީގާ ގުޅޭ އިތުރު ތަފްސީލް ލިބުމުން އެ މައްސަލައާ ގުޅޭ ގާނޫނީ ލަފާ ހޯދައ،ި ފުލެޓްތައް ކަނޑައެޅުމުގެ މަސައްކަތް ކުރިއަށް ގެންދާނެ ކަމަށް ވެސް މިނިސްޓްރީން ބުނެފައިވެ އެވެ.
