ރައީސް މިހެން ވިދާޅުވެފައިވަނީ މިހާރު ދުބާއީގައި ކުރިއަށްދާ ވޯލްޑް ގަވަރމަންޓްސް ސަމިޓް 2024 ގައި ބައިވެރިވެވަޑައިގަންވައިގެން ދެއްކެވި ވާހަކަފުޅުގަވެ.

ވިޒިޓާ އިކޮނޮމީ ކޮންސެޕްޓްގެ ދަށުން އިގްތިސާދީ ދާއިރާތަކުން ދެމެހެއްޓެނިވި ތަރައްގީއެއް ހާސިލްކުރުމަށް ރައީސް ތަސައްވުރު ފާހަގަކުރެއްވި އެވެ. ފްރީ ޒޯނަކާއެކު ސެންޓްރަލް މެރިޓައިމް ބަނދަރާއި ވެލާނާ އިންޓަނޭޝަނަލް އެއާޕޯޓް ތަރައްގީކޮށް، އެންމެ އުތުރުގެ އަތޮޅުގައި މެރިޓައިމް ޑިވެލޮޕްމަންޓް ގްލޯބަލް ޝިޕިން ރޫޓަކާ އިންޓަގްރޭޓް ކުރުން ހިމެނޭ ގޮތަށް ތަރައްގީގެ ބައެއް މަޝްރޫއުތަކަށް އަލިއަޅުވާލެއްވި އެވެ.

މީގެ އިތުރުން އުފެއްދުންތެރިކަން އިތުރުކޮށް ވިޔަފާރި ކުރިއެރުވުމަށް ޓެކްނޮލޮޖީއާއި އާޓިފިޝަލް އިންޓެލިޖެންސް އެއްކޮށްލުމަށް ސަރުކާރުން ކުރާ މަސައްކަތަށް ރައީސް އަލިއަޅުވާލެއްވިއެވެ. ރައީސް ވަނީ ކަރުދާސް ނެތް އީ-ގަވަރމަންޓް ޕްލެޓްފޯމްތައް ޕްރޮމޯޓްކުރުމާއި އެކި ހިދުމަތްތަކުގައި އާޓިފިޝަލް އިންޓެލިޖެންސް ލީވަރ ކުރުން ހިމެނޭ މުހިންމު މެނިފެސްޓޯ ވައުދުތައް ތަކުރާރު ކުރައްވާފައެވެ.

އިގްތިސާދީ ތަރައްގީގެ އިތުރުން ރައީސް މުއިއްޒު ވަނީ ތިމާވެށީގެ ދެމެހެއްޓެނިވި ގޮތެއްގައި ކަންކަން ކުރުމަށް މޯލްޑިވްސްގެ ވަޢުދު ތަކުރާރުކޮށް ފާހަގަކުރައްވައި، ރަސް މާލޭ އީކޯ ސިޓީ މަޝްރޫޢު ފެށުނުކަން ފާހަގަކުރައްވާފައެވެ. މި އިސްނެގުމުގެ މަގުސަދަކީ 65،000 ހައުސިން ޔުނިޓް ފޯރުކޮށްދީ، ދެމެހެއްޓެނިވި ގޮތެއްގައި އާ މިންގަނޑުތަކެއް ކަނޑައަޅައި އާބަން ލިވިންގް ރަނގަޅު ކުރުމެވެ. އޭނާ އިތުރަށް ވިދާޅުވީ މުޅި ރާއްޖޭގައި އާބަން ސެންޓަރުތައް ތަރައްގީ ކުރާނެ ކަމަށެވެ.

އަދި ރާއްޖޭގެ ނާޒުކު މާހައުލާއި މޫސުމީ ދަތިކަން ހައްލުކުރުމަށް ދުނިޔޭގައި އަވަސް ފިޔަވަޅުތަކެއް އެޅުމުގެ އަވަސްކަމާ ބެހޭ ގޮތުން ރައީސް ވަނީ ވާހަކަފުޅު ދައްކަވާފައެވެ. އިއާދަކުރަނިވި ހަކަތަ %33 އަށް އިތުރުކުރުމާއި، އިތުރު ބަޔޯސްފިއާ ރިޒާވްތަކާއި ނެޗުރަލް ޕާކްތައް ގާއިމްކުރުމާއި، ކެތްތެރިކަމަށް ފަސް މިލިއަން ގަސް އިންދުމާއި، ކާބޯތަކެތީގެ ރައްކާތެރިކަމަށް ވަރުގަދަ ދަނޑުވެރިކަން ހޯދުމާއި، މޫސުމަށް ކެތްތެރިވުމަށް އިސްކަންދިނުމާއި، 20 އަހަރުގެ ތަރައްގީގެ ޕްލޭނެއް ތަންފީޒުކުރުމުގެ އަމާޒުތަކަށް އޭނާ ފާހަގަކުރެއްވިއެވެ.

ހުރިހާ ގައުމަކާވެސް ގުޅުން ބިނާވެފައިވަނީ، އިގްތިސާދީ އަދި ސިޔާސީ ގޮތުން ދެގޮތެއްނުވާ، ރާއްޖޭގެ ރައްޔިތުންގެ ބޭނުންތަކަށް ޙައްލު ހޯދައިދިނުމުގައި، އެއްބަޔަކު އަނެއްބަޔަކަށް އިޙްތިރާމްކުރުމާއި، އެއްބަޔަކު އަނެއްބަޔަކަށް ފައިދާ ހޯދުމުގެ މައްޗަށް ކަމަށް ރައީސް ވިދާޅުވިއެވެ. 

ރައީސްގެ ވާހަކަފުޅު ނިންމަވާލައްވަމުން، ދެމެހެއްޓެނިވި ތަރައްގީއަށް ބައިނަލްއަގްވާމީ އެއްބާރުލުން ދިނުމުގެ މުހިންމުކަމަށް އަލިއަޅުއްވާލައްވައި، އެހެން ސަރުކާރުތަކާއެކު އެއްބާރުލުމާއި ޢިލްމު ހިއްސާކުރުމުގެ ވަޢުދުވެވަޑައިގެންނެވިއެވެ. 

އެހެން ސަރުކާރުތަކާއެކު އެއްބަސްވުން ހަދައި، ދެފަރާތުގެ ކާމިޔާބީއާއި އިސްކަންދޭ ކަންކަން ފާހަގަކުރުމަށް ރާއްޖެ އިން އިންތިޒާރުކުރާކަން ރައީސް އިއުލާން ކުރެއްވިއެވެ.

މި މަހުގެ 12 އިން 14 އަށް ކުރިއަށްގެންދާ މި ސަމިޓް ކުރިއަށްދަނީ ދުބާއީގެ މަދީނަތު ޖުމެއިރާގައެވެ.

ރައީސްގެ މި ދަތުރުފުޅަކީ އެކުވެރި ޢަރަބި އިމާރާތުގެ ނައިބު ރައީސް، ބޮޑުވަޒީރު، އެކުވެރި ޢަރަބި އިމާރާތުގެ މިނިސްޓަރ އޮފް ޑިފެންސް، އަދި ދުބާއީގެ ވެރިޔާ، ޝައިޚް މުޙައްމަދު ބިން ރާޝިދު އަލް މަޚްތޫމްގެ ދަޢުވަތަކަށް ކުރައްވާ ދަތުރުފުޅެކެވެ.

މިއަހަރުގެ ވަރލްޑް ގަވަރމަންޓްސް ސަމިޓްގެ ތީމަކީ "ޝޭޕިންގ ފިއުޗަރ ގަވަރމަންޓްސް" އެވެ. މި ސަމިޓުގައި ސަރުކާރުތަކުންނާއި ބައިނަލްއަޤްވާމީ އެކިއެކި ޖަމުޢިއްޔާ ޖަމާޢަތްތަކާއި ޕްރައިވެޓް ސެކްޓަރ އަދި އެކި ދާއިރާތަކަށް ޚާއްސަ ލީޑަރުން ބައިވެރިވެ މުސްތަޤްބަލަށް ހުރި ގޮންޖެހުންތަކާ ގުޅޭގޮތުން މަޝްވަރާކޮށް، ކުރިއަށް އޮތް ޖީލުތަކުގައި އަންނަ ސަރުކާރުތައް ބާރުވެރިކުރުމަށް ކުރަންހުރި ކަންކަމާ ގުޅޭގޮތުން މަޝްވަރާތައް ކުރެވޭނެއެވެ.