ރައީސް މިހެން ވިދާޅުވީ ރައީސް އޮފީހުން ގެނެސްދޭ ރައީސް ޖަވާބުގައި މިއަދު ޒުވާނަކު ކުރި ސުވާލަކަށް ޖަވާބުދެއްވަމުންނެވެ. ފަތުރުވެރިކަމުގެ ދާއިރާގައި މަސައްކަތް ކުރާ އެ ޒުވާނާގެ ސުވާލަކަށްވީ ރިސޯޓްތަކުގައި މަސައްކަތް ކުރާ މުވައްޒަފުންނަށް ފްލެޓް ލިބޭނެ އިރެކެވެ. އަދި ފަތުރުވެރިކަން ކުރިއެރުވުމަށް ޒުވާނުންގެ ހިޔާލާ މަޝްވަރާ ސަރުކާރުން ހޯދާނެ މިންވަރެވެ.
ރައީސް ޑރ. މުއިއްޒު ވިދާޅުވީ ރިސޯޓްތަކުގައި މަސައްކަތް ކުރާ މުވައްޒަފުންނަށް ބޯހިޔާވަހިކަން ދިނުމަކީ އެމަނިކުފާނުގެ ވައުދެއްކަމަށެވެ. އަދި އެ މަސައްކަތް ނިންމާ ވަޒީރުންގެ މަޖިލީހުން ނިންމުންތަކެއް ނިންމާފައިވާކަން ރައީސް ވަނީ ފާހަގަކުރައްވާފައެވެ.
ސޯޝަލް ހައުސިންގެ ތެރެއިން ރިސޯޓް މުވައްޒަފުންނަށް ފްލެޓް ދިނުމަށް މަސައްކަތް ކުރިޔަށް ގެންދަަން ނިންމާ އެކަމާއި ގުޅޭ އޮނިގަނޑު ފާސްކޮށްފައިވާކަމަށް ރައީސް ވިދާޅުވިއެވެ.
ރާއްޖޭގެ އެކި އެކި ސަރަހައްދުތަކުގައި ހިންގާ ބޯހިޔާވަހިކަމުގެ މަޝްރޫއުތަކުންވެސް ރިސޯޓް މުވައްޒަފުންނަށް ވަކި އިންސައްތައެއް ކަނޑައަޅާގޮތަށް ވަޒީރުންގެ މަޖިލީހުން ނިންމާފައިވާކަމަށްވެސް ރައީސް ވިދާޅުވިއެވެ. ސަރުކާރުގެ ސިޔާސަތަކީ ރާއްޖޭގެ އެކި ސަރަހައްދުތަކުގައި ހިންގޭ ހައުސިން މަޝްރޫއުތަކުން އެ ސަރަހަދެއްގައި މަސައްކަތް ކުރާ ރިސޯޓް މުވައްޒަފުންނަށް ޖާގަ ދިނުންކަމަށްވެސް ރައީސް ވިދާޅުވިއެވެ.
ޓްއަރިޒަމް ދާއިރާ ކުރި އަރުވާނީ އެ ދާއިރާގައި މަސައްކަތް ކުރާ ޒުވާނުންގެ ހިޔާލާއި މަޝްވަރާ ހޯދައިގެންކަމަށްވެސް ރައީސް ވިދާޅުވިއެވެ.
