މިނިސްޓްރީ އޮފް ދިވެހި ލޭންގުއޭޖް، ކަލްޗާ އެންޑް ހެރިޓޭޖުން އިއްޔެ ކުރި އިއުލާނުގައި ވަނީ ވިލަރެސްވެރިންނަށްވުމަށް ޝައުގުވެރިވާ މީހުންނަށް އެ މަގާމަށް ކުރިމަތިލުމުގެ ފުރުސަތު ހުޅުވާލާފަ އެވެ.
ދެ އަހަރު ދުވަހުގެ މުއްދަތަކަށް ނަގާ އެ ވަޒީފާގެ މުސާރައިގެ ގޮތުގައި 25,000 ރުފިޔާ ކަނޑައަޅާފައިވާއިރު، ރިސާޗް އެލަވަންސްގެ ގޮތުގައި 5,000 ރުފިޔާ ލިބޭނެ ކަމަށް މިނިސްޓްރީން ބުނެ އެވެ.
ވިލަރެސް ވެރިންގެ މައިގަނޑު މަސްއޫލިއްޔަތުތައް:
- ދިވެހިވަންތަކަމުގެ ބަހާތައް ހިމާޔަތްކޮށް ދިރުވައި އާލާކޮށް ދެމެހެއްޓުމާ ބެހޭ މައުލޫމާތު އެއްކުރުމާއި ދަސްކުރުމާއި ދިރާސާކުރުމާއި ހުށަހަޅައިދިނުމުގެ މަސައްކަތް ވިލަރެސްކުރުން
- ދިވެހިވަންތަކަމުގެ ބަހާތަކާ ބެހޭ ދިރާސާތައް ޝާއިޢުކުރުމަށް ތައްޔާރުކުރާ ތަކެތީގެ ފުރިހަމަކަން ޗެކްކުރުން
- ދިވެހިވަންތަކަމުގެ ބަހާތަކާ ބެހޭ އުފެއްދުންތައް އިތުރުކުރުމުގެ މަސައްކަތްކުރުމަށް ޝައުގުވެރިކަންހުރުން.
- ސުޕަވައިޒް ކުރަންޖެހޭ މުވައްޒަފުންގެ މަސައްކަތްތައް ސުޕަވައިޒްކޮށް އެ މުވައްޒަފުންގެ މަސައްކަތު ފެންވަރު ބެލުން.
މިނިސްޓްރީން ބުނީ، މި ވަޒީފާއަށް އެދި ހުށަހަޅާ ފަރާތްތަކުގެ ތެރެެއިން އެންމެ މަތިން ޕޮއިންޓު ލިބޭ 20 ފަރާތެއް ޝޯޓްލިސްޓު ކުރެވޭނެ ކަމަށެވެ. އަދި, އެއަށް ފަހު މި މަހުގެ 22 އާއި، މާޗް މަހުގެ 12 އާ ދެމެދު މި މަގާމުގެ އިންޓަވިއު ކުރިއަށްދާނެ ކަމަށް މިނިސްޓްރީގެ އިއުލާނުގައިވެ އެވެ.
މި ވަޒީފާއަށް ކުރިމަތިލުމުގެ ސުންގަޑިއަކީ ފެބްރުއަރީ 20 ވަނަ ދުވަހުގެ މެންދުރުފަހު 13:30 އެވެ.
