ރައްޔިތުންގެ މަޖިލިހުގެ މިއަދުގެ ޖަލްސާގައި ވާހަކަ ދައްކަވަމުން އާޒިމް ވިދާޅުވީ، ރާއްޖޭގެ ވެރިކަމަށް ކުރިމަތި ލައްވާ ކޮންމެ ބޭފުޅަކަށް ވެސް ރާއްޖޭގެ އިގްތިސޯދީ ހާލަތު ވަރަށް ރަނގަޅަށް އެނގިވަޑައިގަންނަވާނެ ކަމަށެވެ. ނަމަވެސް އެކަން އެގޮތަށް އޮއްވާ ވެރިކަމަށް އައުމުގެ ބޭނުމުގައި ކެމްޕެއިނުގައި ދޮގު ހަދާ އޮޅުވާލަމުން ދާ ކަމަށް އޭނާ ސިފަކުރެއްވި އެވެ.
އާޒިމް ވިދާޅުވީ އެ މައްސަލަ ހައްލު ކުރުމުގެ ގޮތުން، ދޮގާއި މަކަަރު ހަދައިގެން ވެރިކަމަށް އަންނަ ފަރާތްތައް އަވަހަށް ވެރިކަމުން ބޭލޭނެ ނިޒާމެއް ހޯދަން ޖެހޭ ކަމަށެވެ. އަދި އެކަން ނުކޮށް ދޫކޮށްލައިފި ނަމަ، މުސްތަގުބަލުގައި ވެރިކަމަށް ކުރިމަތިލާ ހުރިހާ ފަރާތްތަކުން ވެސް އެކަން ތަކުރާރު ކުރައްވާނެ ކަމަށް އޭނާ ވިދާޅުވި އެވެ.
މީގެއިތުރުން އާޒިމް ވިދާޅުވީ އެ ފަރާތްތަކުން ގައުމުގެ ވެރިކަމަށް އަންނަނީ އެހެން ފޮޓޯއެއް ދައްކައިގެން ކަމަށާއި، އެއަށްފަހު ކުރައްވާ ކަމަކީ މަޖިލިހުގެ މެންބަރުން ގަތުން ކަމަށެވެ. އަދި އޭގެ ސަބަބުން ރައްޔިތުންގެ ހައްގުގައި ވަކާާލާތު ކުރައްވާނެ މެންބަރުން މަދުވަމުންދާ ކަމަށް އޭނާ ފާހަގަ ކުރެއްވި އެވެ.
އާޒިމް ވިދާޅުވީ އެފަދަ ކަންކަން ހައްލު ކުރެވޭނީ ޒިންމާދާރު އަދި އަމިއްލަ އެދުމެއް ނެތް މެންބަރުން މަޖިލިހަށް އިންތިހާބު ކޮށްގެން ކަމަށެވެ. މިއަދުގެ ޖަލްސާގައި އާޒިމް ވަނީ މަސްވެރިންނަށް ދޭން ޖެހޭ ފައިސާ ވީ އެންމެ އަވަހަކަށް ދިނުމަށް ސަރުކާރަށް ގޮވާލައްވާފަ އެވެ.
