ކެނދިކުޅުދޫ ކައުންސިލުން ބަޔާން ނެރުނީ ދައުލަތުގެ ވަސީލަތްތަކުގެ ބޭނުން ނަހަމަ ގޮތުގައި ހިފާ، ރަަސްމީ ދަތުރުފުޅުގެ ނަމުގައި ރައީސް މުއިއްޒު ކެމްޕޭނު ހަރަކާތްތައް ހިންގަވާ ކަމަށް ބުނެ އެވެ.
އެލްޖީއޭއިން ކެނދިކުޅުދޫ ކައުންސިލަށް އަންގާފައި ވަނީ މިއަދު މެންދުރު 2:00 ގެ ކުރިން އެ ބަޔާން ބާތިލު ކުރުމަށެވެ.
އެކަމަކު ކެނދިކުޅުދޫ ކައުންސިލުގެ ރައީސް މުހައްމަދު ރައުފް ފޭސްބުކްގައި ކުރެއްވި ޕޯސްޓުގައި ވިދާޅުވީ، އެ ކައުންސިލަށް ލިބިފައިވާ ގާނޫނީ ލަފަޔާއެކު ކައުންސިލް މެމްބަރުން ނިންމީ ބަޔާން ބާތިލު ނުކުރުމަށް ކަމަށައި، އެގޮތަށް ނިންމީ ބަޔާން ބާތިލު ކުރަން ޖެހޭނެފަދަ ގާނޫނީ ސަބަބެއް އެލްޖީއޭއަށް ބުނެދެވިފައި ނުވާތީ ކަމަށެވެ.
އެލްޖޭއޭގެ އެ އަމަލު ކުށްވެރިކުރައްވަމުން ރައޫފް ވިދާޅުވީ އެލްޖޭއޭއިން އެންގިއެންގުމަކީ ލާމަރުކަޒީ ގާނޫނުގެ ރޫހާ މުޅިން ދެކޮޅު، ކައުންސިލްތަކުގެ ބާރުތައް ހަނިކުރުމަށް ކުރި އަމަލެއް ކަމަށެވެ.
އެމްޑީޕީ މެޖޯރިޓީ އޮންނަ އެ ކައުންސިލްގެ ހުރިހާ މެމްބަރުން އަނގަމަތީގައި އެޅުއްވި ޓޭޕުގައި "އެލްޖީއޭ" ލިޔެފައި އޮތެވެ. އަދި މެމްބަރުން ވަނީ އިހްތިޖާޖްގެ ފޮޓޯތައް ސޯޝަލް މީޑިއާގައި އާއްމުކުރައްވާފަ އެވެ.
