ރާއްޖޭގެ ރަށްތަކަށް ރައީސް ޑރ. މުހައްމަދު މުއިއްޒު ކުރައްވަމުން ގެންދަވާ ދަތުރުފުޅުގައި އިއްޔެ މ. ދިއްގަރަށް ވަޑައިގެން، އެރަށު ރައްޔިތުންނާ ބައްދަލު ކުރައްވައި ދެއްކެވި ވާހަކައިގައި އާދަމް ޝަރީފް ވިދާޅުވީ ރައީސް މުއިއްޒުގެ ގާނޫނީ ޒިންމާ އަދާ ކުރެއްވުމަށް އޮތް އެންމެ ބޮޑު ހުރަހަކީ މަޖިލިސް ކަމަށާއި މަޖިލީހުގައި މިއަދު ހުންނެވި ނަމަ މަޖިލިސް މެންބަރެއްގެ ދަތްދޮޅި ދުއްވާނުލައި ހުރެވޭނެތޯ ސުވާލު އުފެދޭ ކަމަށެވެ.
ކުރީގެ ރައީސް އަބްދުﷲ ޔާމީންގެ ސަރުކާރުގެ ޑިފެންސް މިނިސްޓަރަކަށް އާދަމް ޝަރީފް ހުންނެވި އިރުވެސް އޭނާ ވަނީ މަޖިލީހުގެ ބައެއް މެމްބަރުންގެ ދަތްދޮޅި ދުއްވާލަން ބޭނުންވާ ކަމަށް ވިދާޅުވެފައެވެ. އެފަހަރު އެގޮތަށް ވިދާޅުވެފައިވަނީ ސިފައިންގެ ޖަލްސާއެއްގައެވެ. އެ ޖަލްސާގައި ވާހަކަދައްކަވަމުން އާދަމް ޝަރީފް އެގޮތަށް ވިދާޅުވި އޯޑިއޯ އެފަހަރު ވަނީ ލީކުވެފައެވެ. އެ އޯޑިއޯގެ މައްސަލަ އެ ދުވަސްވަރު ވަރަށް ގޯސްވި އެވެ. އެ މައްސަލައިގެ ފަހުން އޭނާގެ ވަނަމަކަށް ބައެއް މީހުން "ދަތްދޮޅި ޝަރީފް" ވެސް ކިޔަ އެވެ.
ރައްޔިތުންގެ މަޖިލީހުގެ މެމްބަރުންގެ "ދަތްދޮޅި ދުއްވާލާ ވާހަކަ" އަކީ އާދަން ޝަރީފް ވަރަށް ގިނައިން ސިޔާސީ އެއްވުންތަކުގައި ވިދާޅުވާ ވާހަކައެކެވެ. އެގޮތުން 23 ސެޕްޓެމްބަރ 2022 ގައި ޕީޕީއެމް އޮފީހުގައި ބޭއްވި ޖަލްސާގައި ވެސް އާދަމް ޝަރީފު ވަނީ ރާއްޖޭގެ ހާލަތު ބަދަލުކުރަން އެންމެން ގުޅިގެން މަސައްކަތްކުރަން ޖެހޭ ކަމަށާއި ދަތްދޮޅި ދުއްވާލައިގެންވެސް ކުރީގެ ރައީސް އަބްދުﷲ ޔާމިން އަބްދުލް ގައްޔޫމަށް ވެރިކަން އަލުން ހޯދާއިދޭން ތިބި ކަމަށް ވިދާޅުވެ މާރާމާރީއަށް ހިތްވަރުދެއްވާފައެވެ.
މި ވާހަކަތަކާ ގުޅިގެން ވިލިނގިލީ ދާއިރާގެ މެމްބަރު ސައުދު ހުސެއިން ވިދާޅުވީ ރައްޔިތުންގެ މަޖިލީހުގެ މެމްބަރުންގެ ގަޔަށް ބޮލަށް އަރާ މާރާމާރީ ހިންގަން ވަޒީރު ބޭފުޅުން ފާޅުގައި އަޑުއުފުލާއިރު ރައީސުލްޖުމްހޫރިއްޔާ އަތް ޖައްސަވަން އިންނެވުމަކީ ގައުމުގެ މަސްލަހަތު ނަގާލަން ހިތްވަރު ދިނުން ކަމަށެވެ. ރައީސުލްޖުމްހޫރިއްޔާ އެ ވަޒީރަށް ފިޔަވަޅު ނާޅާނަމަ މަޖިލީހުން ފިޔަވަޅު އަޅަންޖެހޭ ކަމަށް ސައުދު ވިދާޅުވި އެވެ.
އާދަމް ޝަރީފް ދެއްކެވި ވާހަކައާ ގުޅިގެން އެންމެ ބޮޑު އިދިކޮޅު ޕާޓީ، އެމްޑީޕީން ވެސް ވަނީ ކަންބޮޑުވުން ފާޅުކޮށްފަ އެވެ. އެ ޕާޓީގެ ކެމްޕޭނު ތަރުޖަމާނު، އަހުމަދު އީސާ ވިދާޅުވީ އާދަމް ޝަރީފުގެ ބަސްތަކުން ދޭހަވަނީ ކުރިއަށް އަންނަން އޮތް ދުވަސްތަކުގެ ނާމާންކަން ކަމަށެވެ.
އާދަމް ޝަރީފް އިއްޔެ ދެއްކެވި ވާހަކައަކީ ޒިންމާދާރުކަން ކުޑަ ވާހަކައެއްގެ ގޮތުގައި ޑިމޮކްރެޓްސްގެ ޕީޖީ ލީޑަރު އަލީ އާޒިމް ވަނީ ސިފަކުރައްވައިފަ އެވެ.
އާޒިމް ވިދާޅުވީ ރައްޔިތުންގެ މަޖިލީހަކީ ކުންފުންޏެއް ނޫން ކަމަށާއި އެތަނުން އެންމެ މީހަކު ބޭނުންވާހައި ގޮތަކަށް ކަންކަން ނިމިގެން ނުދާނެ ކަމަށާއި އާދަމް ޝަރީފް ދެއްކެވި ވާހަކައިގެ މައްސަލަ ޕާޓީ ލެވެލްގައި މަޝްވަރާ ކުރައްވާނެ ކަމަށެވެ.
އާޒިމް ވިދާޅުވީ ކޮންމެ ފަސް އަހަރަކުން އެއް އަހަރު މަޖިލީހަށް މެންބަރުން އައްޔަން ކުރަނީ ރައްޔިތުންގެ އަޑު މަޖިލީހުގައި އިއްވުމަށް ކަމަށެވެ. އެހެންވީމާ ވޯޓު ކަރުދާހުގައި ރައްޔިތުން ޖަހާ ހެޔޮ ފާހަގައާ އެއްގޮތަށް މަޖިލީހުގެ ތަޅުމުގައި މެންބަރުން މަސައްކަތް ކުރައްވާނެ ކަމަށް އޭނާ ވިދާޅުވި އެވެ.
މަޖިލިސް މެންބަރުންގެ "ދަތްދޮޅި ދުއްވާނުލައި" ހުރެވިދާނެތޯ ސުވާލު އުފައްދަވައި އާދަމް ޝަރީފު ވާހަކަ ދެއްކެވީ ރައީސް އައްޔަން ކުރެއްވި ބައެއް ވަޒީރުންނަށް މަޖިލީހުން ރުހުން ނުދިނުމުންނާއި ފުށިދިއްގަރު ފަޅު ހިއްކުމަށް ބޭނުންވާ ފައިސާ ބަޖެޓުން އުނި ކުރުމާ ގުޅުވަ އެވެ.
ދިއްގަރުގައި ބޭއްވި ޖަލްސާގައި: މެންބަރުންގެ ދަތްދޮޅި ދުއްވާލާ ވާހަކަ އަނެއްކާވެސް އާދަމް ޝަރީފް ވަނީ ދައްކަވާފައި
އާދަމް ޝަރީފް ވިދާޅުވީ ރައްޔިތުންގެ މަޖިލީހުން އެއްވެސް ހައްގަކާ ނުލައި ރައީސްގެ ގާނޫނީ ޒިންމާ އަދާކުރުމަށް ދަތި ކުރަމުންދާ ކަމަށެވެ. އޭގެ އެއް މިސާލުގެ ގޮތުގައި ފާހަގަ ކުރެއްވީ ތިން މިނިސްޓަރަކަށް ރުހުން ނުދިނުމެވެ. އާދަމް ޝަރީފަކީ މަޖިލީހުން ރުހުން ދީފައިވާ މިނިސްޓަރަކެވެ.
ރަސްމާލެ ހިއްކުމުގެ މަޝްރޫއުގެ ބަޖެޓް ކަނޑާލީ ވެސް ޖެއްސުން ކުރުމުގެ ގޮތުން ކަމަށް އޭނާ ސިފަ ކުރެއްވި އެވެ. އަދި ލާމަރުކަޒީ ނިޒާމް ވެސް ރައީސް އެންމެ ފުރިހަމަ އަށް ތަންފީޒު ކުރައްވަމުންދާތީ އެކަމާ ދެކޮޅަށް ވެސް އެމްޑީޕީން މަސައްކަތް ކުރާ ކަމަށް ވިދާޅުވި އެވެ.
