މިދިޔަ އަހަރުގެ އޮކްޓޫބަރު މަހުގެ ހަތްވަނަ ދުވަހުން ފެށިގެން އިސްރާއީލުން ގާޒާއަށް ދެމުންގެންދާ ހަމަލާތަކުގައި މިހާތަނަށް 30،000 އަށްވުރެ ގިނަ މީހުން ވަނީ ޝަހީދުކޮށްލައިފައެވެ. ހަމަލާތަކުގެ ސަބަބުން ޒަޚަމުވި މީހުންގެ އަދަދު ވަނީ 71،000 އަށް އުފުލިފަ އެވެ.
ޑަބްލިޔޫއެޗްއޯގެ ޑައިރެކްޓަރު ޖެނެރަލް ޓެޑްރޯސް އަދަނޮމް ގެބްރިއޭސޮސް ވިދާޅުވި ގޮތުގައި ޑަބްލިޔުއެޗްއޯގެ ޓީމުތަކުން ދާދި ފަހުން ގާޒާއަށް ކުރި ޒިޔާރަތުގައި އިސްރާއީލުން ކާބޯތަކެތި ހަތިޔާރެއްގެ ގޮތުގައި ބޭނުންކޮށްގެން ގާޒާގެ ކުޑަކުދިން މަރާ މަންޒަރު އެޓީމުތަކުގެ މެންބަރުންނަށް ފެނި އެބޭފުޅުންގެ ރިޕޯޓްގައި އެކަން ހާމަކޮށްފައިވެ އެވެ.
އިޒްރޭލުން ގާޒާއަށް ދިން ހަމަލާއެއްގައި ކުޑަކުދިންތަކަކަށް އަނިޔާވެފައި - ފޮޓޯ: ރޮއެޓާސް
އިސްރާއީލު ސިފައިން ގާޒާގެ ހޮސްޕިޓަލްތަކަށް ހަމަލާދީ ހޮސްޕިޓަލްތައް ފުނޑުފުނޑުކޮށްލާފައިވާ މަންޒަރުވެސް އެޓީމުތަކަށް ފެނިފައިވާކަމަށާއި ޣައްޒާގެ ޑޮކްޓަރުންނާއި ނަރުހުން މަރަން އިސްރާއީލު ސިފައިން މަސައްކަތްކުރާ މަންޒަރުވެސް ފެނިފައިވާކަން އެޓީމުތަކުން ހާމަކޮށްފައިވާ ކަމަށް ޓެޑްރޯސް ވިދާޅުވި އެވެ.
އަދި ކަރަންޓާއި ފެންފަދަ އެއްވެސް ވަސީލަތެއް ނެތްމަންޒަރާއި އިސްރާއީލު ސިފައިން ހަމަލާދީ އޭގެތެރެއިން އަލްޢަވްދާ ހޮސްޕިޓަލްގެ ބޮޑުބައެއް ހަލާކުކޮށްލާފައިވާ މަންޒަރެވެ. ކާބޯތަކެތި ނުލިބިގެން ކަމާލް ޢަދްވާން ހޮސްޕިޓަލުން 10 ކުޑަކުދިން މަރުވެފައިވާކަން މިރިޕޯޓްގައި ފާހަގަކޮށްފައިވެ އެވެ.
ހަނގުރާމަ ހުއްޓައިލުމަށް ދުނިޔޭގެ ސިއްހަތާބެހޭ ޖަމްއިއްޔާ ހިމެނޭހެން އެކި ގައުމުތަކުންނާއި ޖަމާއަތްތަކުން ގޮވާލި ގޮވައިލުންތަކަށް އިޒްރޭލުން މިހާތަނަށް ދެނީ ބީރު ކަންފަތެކެވެ. އިޒްރޭލުން ބުނީ ހަނގުރާމަ ހުއްޓައިލާނީ ހަމާސްގެ ވަސް އެއްކޮށް ފުހެލުމަށް ފަހު ކަމަށެވެ.
