ގާނޫނީ ހައިސިއްޔަތާ މެދު ސުވާލު އުފެދިފައިވާ އެފްއޭއެމްގެ އެކްސްކޯއިން ނިންމާފައިވަނީ އަންނަ މަހުގެ 20 ވަނަ ދުވަހު އިންތިހާބު ބާއްވާށެވެ. އެއީ މަޖިލިސް އިންތިހާބުގެ އެއް ދުވަސް ކުރިއެވެ.
އެފްއޭއެމް އިން ޖެނުއަރީ 31 ވަނަ ދުވަހު ބާއްވަން ނިންމި އިންތިހާބު ކެންސަލްކުރަން ޖެހުނު އެންމެ ބޮޑު ސަބަަބު ގުޅިފައި އޮތީ ކްލަބް ވެލެންސިއާއާ އެވެ. އެކަން އެހެން އޮއްވައި، އަލުން އިންތިހާބަށް އިއުލާން ކުރުމުގެ ކުރިން އެފްއޭއެމުންވަނީ ވެލެންސިޔާ ސަސްޕެންޑްކޮށްފައެވެ.
ގާނޫނީ ހައިސިއްޔަތާ މެދު ސުވާލު އުފެދިފައިވާ އެފްއޭއެމްގެ އެކްސްކޯއިން ނިންމާފައިވަނީ އަސާސީ ގަވާއިދާ އެއްގޮތަށް، 45 ދުވަހުގެ ތެރޭގައި އިންތިހާބެއް ބާއްވާށެވެ. މި މަހުގެ 16 ގެ 14:00 ގެ ކުރިން މަގާމަށް ކުރިމަތިލާ ފަރާތްތަކުން ލިޔެކިޔުންތައް ހުށަހަޅަން ޖެހެއެވެ.
ގާނޫނީ ހައިސިއްޔަތާ މެދު ސުވާލު އުފެދުނީ، އެފްއޭއެމްގެ އެކްސްކޯގެ މެންބަރުންގެ އަދަދާ ހުރެއެވެ. އެކްސްކޯއިން އެންމެ ފަހުން މުފާ އިސްތިއުފާ ދިނުމާއެކު މެންބަރުންގެ އަދަދު ހަތަރަކަށް މަދުވާނެއެވެ.
ވެލެންސިއާ ފުޓްބޯޅައިގެ ހަރަކާތްތަކުން ސަސްޕެންޑް ކުރީ ކްލަބުން ވަކިކުރި ބޯޑު މެމްބަރު، ހަސަން ވަހީދު (ދޮނާ) ގަވާއިދާ ހިލާފަށް ވަކިކޮށްފައިވާތީ އެ ހުރިހާ ކަމެއް ބަލައި، ވެލެންސިއާގެ ކަންކަން ރަނގަޅު ގޮތަށް ކުރިއަށް ގެންދިއުމަށް ކަމަށް ބުނެ އެވެ. އަދި ވެލެންސިއާ އިން އާ ބޯޑެއް އިންތިހާބު ކުރަންދެން އެ ކްލަބް ސަސްޕެންޑް ކޮށްފައި ބޭއްވުމަށް ވަނީ ނިންމައިފަ އެވެ.
