މިއަދު އިލެކްޝަންސް ކޮމިޝަންގެ ނައިބް ރައީސް އިސްމާއިލް ހަބީބް ކުރެއްވި އެކްސް ޕޯސްޓެއްގައި ވިދާޅުވީ 2024 އެޕްރީލް 21 ވާ އާދީއްތަ ދުވަހު ބޭއްވުމަށް ހަމަޖެހިފައިވާ ރައްޔިތުންގެ މަޖިލީހުގެ އިންތިހާބު 2024 ގައި ވޯޓުލާން ރަޖިސްޓަރީވެފައިވާ ރަށް ނޫން އެހެން ތަނެއްގައި ވޯޓުލުމަށްޓަކައި ރަޖިސްޓަރީވުމުގެ ފުރުސަތު މިއަދުން ފެށިގެން ހުޅުވާލެވިފައިވާ ކަމަށެވެ.
ހަބީބްގެ ޕޯސްޓުގައި ވާ ގޮތުން މިއަދު މެންދުރު 2 ޖަހާއިރުން ފެށިގެން އަންނަ ހޮނިހިރު ދުވަހުގެ މެންދުރުފަހު 3 ޖަހަންދެން ރީރަޖިސްޓްރީ ވުމުގެ ފުރުސަތު ހުޅުވާލެވިފައިވާ ކަމަށެވެ.
ރީރަޖިސްޓަރީ ކުރައްވަން ބޭނުންފުޅުވާ ފަރާތްތަކުން ދުރާލާ އޮންލައިންކޮށް ރީރަޖިސްޓަރީ ކުރެެއްވުމަށް ހަބީބް ވަނީ އެދިވަޑައިގެންފަ އެވެ.
ރީރަޖިސްޓާ ކުރުމަށް ބޭނުންވާ ބޭފުޅުން ރީރަޖިސްޓްރޭޝަން ފޯމް ފުރާދިނުމަށް އީސީން އެދިލައްވަ އެވެ.
އެންމެ ފުރަތަމަ މަޖިލީސް އިންތިހާބު ބާއްވަން ހަމަ ޖެހިފައި އޮތީ މި މަހުގެ 17 ވަނަ ދުވަހު އެވެ. ނަމަވެސް އެ ދުވަސް ރޯދަ މަހާއި ދިމާ ވުމުގެ ސަބަބުން ރޯދަ މަހު އިންތިހާބު ނުބޭއްވޭ ގޮތަށް މަޖިލީސް ފާސް ކުރި އިސްލާހު ދެވަނަ ފަހަަރަށް ރައީސް އަށް ފޮނުވުމުން އެ އިސްލާހު ރައީސް ތަސްދީގު ކުރެއްވި އެވެ
އެހެން ކަމުން ކުރިން މި މަހު ބާއްވަން އޮތް އިންތިހާބު އަންނަ މަހުގެ 21 ވަނަ ދުވަހަށް ވަނީ ލަސްކުރެވިފައި އެވެ.
