ކެނދިކުޅުދޫ ކައުންސިލުން ބަޔާނެއް ނެރުނީ މި ފަހުން ރަށްރަށަށް ކުރެއްވި ރަސްމީ ދަތުރުފުޅުގައި ސަރުކާރުގެ ކެންޑިޑޭޓުންނަށް ވޯޓު ދިނުމަށް ރައީސް އެދިވަޑައިގަންނަވާފައިވާތީ އެކަމުގެ ކަންބޮޑުވުން ފާޅުކޮށެވެ. އެ ބަޔާން ބާތިލުކުރުމަށް އެލްޖީއޭއިން އެންގި ނަމަވެސް އެކަމަށް، ކައުންސިލުން ވަނީ ދެކޮޅުހަދާފަ އެވެ.
އެލްޖީއޭ އިން މިއަދު ބޭއްވި ނޫސްވެރިންގެ ބައްދަލުވުމުގައި އެ އިދާރާގެ ސީއީއޯ މަރިޔަމް ޒުލްފާ ވިދާޅުވީ އޮފީސް ހިންގުމުގެ ޒިންމާ އޮންނަނީ ސީއީއޯ އަށް ކަމަށެވެ. އެހެންކަމުން ކެނދިކުޅުދޫ ކައުންސިލްގެ ބަޔާނުން ރައީސްގެ އަބުރުފުޅަށް ނޭދެވޭ އަސަރުތަކެއް ކުރާނެ ކަމަށް ގަބޫލު ކުރެވޭތީ، އިދާރާގެ ހުރުމަތް ކުޑަނުވާނެ ގޮތަށް އެކަން ގެންދިއުމަށް އެންގީ ކަމަށް އޭނާ ވިދާޅުވި އެވެ.
އެ މައްސަލައިގައި ބަންޑާރަ ނައިބު އަހުމަދު އުޝާމް ވިދާޅުވެފައި ވަނީ އެލްޖީއޭ އިން ބަޔާން ބާތިލުކުރުމަށް އަންގާފައި ވަނީ ގާނޫނާ ހިލާފަށް ކަމަށެވެ.
ޒުލްފާ މިއަދު ވިދާޅުވީ އެ މައްސަލައާ ގުޅިގެން ބަންޑާރަ ނައިބުގެ ސިޓީއެއް ލިބުނީ މިދިޔަ ބުރާސްފަތި ދުވަހު ކަމަށް ޒުލްފާ ވިދާޅުވި އެވެ. އަދި އެކަމާ ގުޅޭ ގޮތުން، އިންކުއަރީ ހަދަން ގާނޫނުގައި އޮންނަ ކަމަށް ބަންޑާރަ ނައިބު ވިދާޅުވެފައިވާ ކަމަށް ޒުލްފާ ފާހަގަކުރެއްވި އެވެ.
ޒުލްފާ ވިދާޅުވީ ދެން އެންމެ އަވަހަށް އެލްޖީއޭގެ ބޯޑުގެ ބައްދަލުވުމެއް އޮންނާނީ މި މަހުގެ 29 ވަނަ ދުވަހު ކަމަށެވެ. ނަމަވެސް މައްސަލައިގެ ހައްސާސް ކަމުން އެހާ ތަނަށް މަޑުކުރުމަކީ ރަނގަޅު ގޮތް ކަމަށް ނުފެންނާތީ އަވަސް ފިޔަވަޅެއް އެޅީ ކަމަށް އޭނާ ވަނީ ވިދާޅުވެފަ އެވެ.
އެ މައްސަލާގައި ލޯކަލް ގަވަމެންޓް މިނިސްޓަރު އާދަމް ޝަރީފް ވިދާޅުވެފައިވާ ގޮތުގައި ކުރިއަށް އޮތް ތަނުގައި ކައުންސިލުން ނެރޭ ބަޔާންތަކާ ގުޅިގެން ފިޔަވަޅު ނާޅުއްވާނެ ކަމުގަ އެވެ.
މިނިސްޓަރު އާދަމް ޝަރީފް ވިދާޅުވީ އިދާރާއަކަށް ޤާނޫނުން މަތިކުރާ މަސައްކަތްތައް ކުރުމުގައި ސަރުކާރުން ގޮތް ނުކިޔާނެކަމަށެވެ. އަދި ކައުންސިލްތަކުން ނެރޭ ބަޔާނަށް ރައްދުދީ، ސަރުކާރުން އެއްވެސް ކައުންސިލަކަށް ފިޔަވަޅު އެޅުމަކީ ކުރާނެ ކަމެއް ނޫންކަމަށެވެ. ވަޒީރު ވިދާޅުވީ މިއީ ރައީސް ޑރ.މުހައްމަދު މުއިއްޒު ވެސް އިރުޝާދު ދެއްވާފައިވާ ގޮތްކަމަށެވެ.
