އާންމުންނަށް ސީދާ ރައީސާ ސުވާލުކުރެވޭ 'ރައީސްގެ ޖަވާބު' ސިލްސިލާގައި މިއަދު ހިޔާ ފުލެޓު H-12-02-01، ނިޝްރީނާ މޫސާ ވަނީ ހުޅުމާލެ ދެވަނަ ފިޔަވަހީގައި ކުޅިވަރު ކުޅޭނެ އެކަށީގެންވާ ވަސީލަތްތައް ނެތުމާއި ގުޅިގެން ކަންބޮޑުވެފައެވެ.
ޖަވާބުގައި ރައީސް ވިދާޅުވީ މި ސަރުކާރުން ހުޅުމާލޭ ދެވަނަ ފިޔަވަހީގައި ކުރަންޖެހޭ ކަންކަން ކުރަން ނިންމާފައިވާ ކަމަށެވެ.
އޭގެ ތެރެއިން ކުޅިވަރު ކުޅޭ ތަންތަނާއި ޕާކް ތަކާއި ހިތް ފަސޭހަ މައިދާން ހެދުމަށް ކުރަންޖެހޭ މަސައްކަތްތަކާއި މެދު މިހާރުވެސް މަޝްވަރާ ކުރަމުން އަންނަ ކަމަށް ރައީސް ވިދާޅުވި އެވެ.
ހިޔާ ސަރަހައްދަކީ ގިނަ އަދަދެއްގެ ރައްޔިތުން އުޅޭ ސަރަހައްދަކަށްވުމުން އެ ސަރަހައްދުގައި އަޅަން ޖެހޭ ތަންތަން ވީހާވެސް އަވަަހަކަށް އަޅާ ނިންމުމަށް އެޗްޑީސީ އާއި އެކު މަޝްވަރާ ކުރަމުން އަންނަ ކަމަށް ރައީސް ވިދާޅުވި އެވެ.
މި ތަންތަނުގެ ތެރޭގައި އަންހެން ބޭފުޅުންނައް ހާއްސަކޮށް އަޅާ ކުޅިވަރު ކުޅޭ ތަންތަން ހުންނާނެ ކަމަށާއި އެ ތަންތަން ވީހާވެސް އަވަހަކަށް އެެތަންތަނުގެ މަސައްކަތް ފެށިގެންދާނެ ކަމަށް ރައީސް ވިދާޅުވި އެވެ
