އެފްއޭއެމުން އަންނަ މަހުގެ 20 ވަނަ ދުވަހު ބާއްވަން ކަނޑައަޅާފައިވާ އިންތިހާބު، ފީފާއިން ހުއްޓުވިކަން މީޑިއާގެ ސަމާލުކަމަށް އައިތާ ކުޑައިރުކޮޅެއްގެ ތެރޭގައި ސޯޝަލް މީޑިއާގައި ޓޮމްވަނީ، އެފްއޭއެމްގެ އިންތިހާބު ފަސްކުރަން ފީފާއިން އެންގި ސަބަބުތައް ކަމަށް ވިދާޅުވެ، ތަފްސީލްތަކެއް ދެއްވާފައެވެ. ޓޮމްއަކީ، އަންނަ މަހު އޮންނަ އިންތިހާބުގައި ވާދަކުރައްވާ އެއް ކެންޑިޑޭޓެވެ.
ޓޮމް ވިދާޅުވީ އެފްއޭއެމްގައި ހުރި މައްސަލަތައް ހައްލުކޮށް ކަންކަން ރަނގަޅުކުރެވޭނީ ނޯމަލައިޒް ކޮށްގެން ކަމަށެވެ. ނޯމަލައިޒްކުރުމަކީ، މިހާރު އޮތް އެފްއޭއެމްގެ ލީޑަޝިޕް އަތުން އެތަނުގެ ހިންގުމުގެ ކޮންޓްރޯލް ނަގައި، ވަކި ކޮމިޓީއެއްގެ ދަށުން ކަންކަން ކުރިއަށް ގެންގޮސް އިންތިހާބަކާ ހަމައަށް ގެންދިއުމެވެ.
"ފެންނަ ފެނުމުގައި އެފްއޭއެމް ނޯމަލައިޒްކޮށްގެން ނޫންގޮތަކަށް ވިގަނިއަރާފައިވާ ކަންކަން ހަމައަކަށް ނޭޅޭނެ،" ތޯރިގު، އޭނާގެ ރަސްމީ ފޭސްބުކް އެކައުންޓް މެދުވެރިކޮށް ލިޔުއްވައިފައިވެ އެވެ.
އެފްއޭއެމްގެ އިންތިހާބުގައި ވާދަކުރަން ކެންޑިޑެސީ ހުށަހެޅީ ތޯރިގުގެ އިތުރުން، ކޮރަޕްޝަންގެ ބޮޑެތި ތުހުމަތުތަކެއް ކުރެވި މިހާރު ދައުވާ އުފުލާފައިވާ އެފްއޭއެމްގެ މިހާރުގެ ރައީސް ބައްސާމް އަދީލް ޖަލީލް އެވެ. ބައްސާމް، ކުރިމަތިލެއްވިކަން އަދި އެފްއޭއެމް އިން ހާމައެއްނުކުރެ އެވެ.
