ފީފާއިން ހުއްޓުވާފައިވާ އެފްއޭއެމްގެ އިންތިހާބާ ގުޅިގެން ފެންމަތިވެފައިވާ މައްސަލަތައް ދެނެގަންނަން ފީފާ އާއި އޭއެފްސީގެ ޓީމެއް ރާއްޖެ އަށް އައުމަށް ތައްޔާރުވެފައިވާކަން އިތުބާރު ހުރި ފަރާތްތަކުން ކަށަވަރުކޮށްދެއެވެ. އެހެންނަމަވެސް އެފްއޭއެމުން މިކަމުގައި އެއްވެސް އެއްޗެއް ބުނެފައެއް ނުވެއެވެ. މައުލޫމާތު ލިބިފައިވާ ގޮތުގައި ފީފާ އަދި އޭއެފްސީގެ ޓީމުގެ އިވެލުއޭޝަނަށް ފަހު އެފްއޭއެމް ނޯމަލައިޒް ކުރާނެއެވެ.
ނޯމަލައިޒްކުރުމަކީ، މިހާރު އޮތް އެފްއޭއެމްގެ ލީޑަޝިޕް އަތުން އެތަނުގެ ހިންގުމުގެ ކޮންޓްރޯލް ނަގައި، ވަކި ކޮމިޓީއެއްގެ ދަށުން ކަންކަން ކުރިއަށް ގެންގޮސް އިންތިހާބަކާ ހަމައަށް ގެންދިއުމެވެ. މީގެ ކުރިންވެސް އެފްއޭއެމްގެ ކަންކަން ބޮއްސުންލައިގެން ދިޔުމުން މި ފިޔަވަޅު ފީފާއިން އެޅިއެވެ.
ފީފާގެ ޓީމެއް ރާއްޖެ އަންނަކަމުގެ އިޝާރާތެއް ކޮށްފައި ވާއިރު، އެފްއޭއެމުން މިދިޔަ މަހު ބޭއްވި ކޮންގްރެސްއާ މެދު ބައެއް ކްލަބްތަކުން ވަނީ ފީފާ އަށް ޝަކުހުށަހަޅައިފަ އެވެ. އެނގިފައިވާ ގޮތުގައި ފީފާގެ ޓީމުން ކްލަބުތަކުގެ އިތުރުން، ސަރުކާރުގެ ކަމާބެހޭ ފަރާތްތަކާވެސް މަޝްވަރާކުރާނެއެވެ.
އެފްއޭއެމްގައި އެ ހުރި މައްސަލަތައް ހައްލުކޮށް ކަންކަން ރަނގަޅުކުރެވޭނީ ނޯމަލައިޒް ކޮށްގެން ކަމަށް އެ އެސޯސިއޭޝަންގެ އިންތިހާބުގައި ވާދަކުރަން ކެންޑިޑެސީ ހުށަހަޅާފައިވާ، އެ ޖަމިއްޔާގެ ކުރީގެ ރައީސް އަހުމަދު ތޯރިގު ޓޮމްވެސްވަނީ ވިދާޅުވެފައެވެ.
