"ސީއެންއެމް" އަށް މައުލޫމާތު ދެއްވަމުން އަލިފުށީ ކައުންސިލްގެ ރައީސް އާދަމް އިމްރާން ވަނީ އަލިފުށީގެ ކުނިކޮށި ހުރީ ރަށުގެ ވަރަށް އެތެރޭގައި ކަމަށް ވިދާޅުވެ އެއާ ގުޅިގެން ވަރަށް ބޮޑެތި އުނދަގޫތަށް ރަށު ރައްޔިތުންނަށް ކުރިމަތިވާކަމަށް ވިދާޅުވެފަ އެވެ. އަދި ކުނި މެނޭޖްކުރުން ވެމްކޯއާ ހަވާލުކޮށްފައިވާނަމަވެސް އެ ކުންފުނިން ކުނި ބަލާ ނާންނަތާ 2 އަހަރު ދުވަހާ ގާތްވެދާނެކަމަށްވެސް ކައުންސިލް ރައީސް ވަނީ ވިދާޅުވެފަ އެވެ.
އަދި އެކަމަށް ބަރާބަރަށް ފައިސާ ދައްކަމުން ދާކަމަށްވެސް އަލިފުށީ ކައުންސިލް ރައީސް ވަނީ ފާހަގަކޮށްފަ އެވެ.
މި މައްސަލައާ ގުޅޭގޮތުން ސީއެންއެމް އިން ވަނީ ވެމްކޯގެ ޑީއެމްޑީ މުހައްމަދު އަބްދުލް ކަރީމް އާ ސުވާލުކުރައްވާފަ އެވެ. ކަރީމް ވިދާޅުވީ އަލިފުށީ ކައުންސިލަކަށް އެގޮތަށް ބުނެވެން ނޯންނާނެކަމަށާއި އެއްބަސްވުން ވާނީ މި ޖެނުއަރީ މަހު ރިވައިޒް ކުރެވިފައި ކަމަށެވެ.
މީގެ އިތުރުން ވެމްކޯގެ ޑީއެމްޑީ ވިދާޅުވީ މިހާރު ރިވައިޒްކުރި އެއްބަސްވުމާއި އެކު އަލިފުށީގެ ދަތުރު ސްކެޑިއުލް ވެފަ އިނީ މިއަންނަ މަހަށް ކަމަށެވެ.
ކަންމިހެން އޮތުމާއި އެކު އެއްގޮތަކަށްވެސް 2 އަހަރު ކުނި ބަލާ ނާދެއޭ ބުނެވޭކަށެއް ނޯންނާނެކަމަށާއި އެއީ އަދި މުޅިން ރަނގަޅު ވާހަކައެއް ނޫން ކަމަށްވެސް ކަރީމް ވަނީ ވިދާޅުވެފަ އެވެ. އަދި ކުރީގައި އަލިފުށިން ހަދާފައި އޮތް އެއްބަސްވުން މުއްދަތު ހަމަވެގެން އަލިފުށި ކައުންސިލްއިން އެ އިނީޝިއޭޓިވް ނަގާފައެއް ނެތްކަަމަށްވެސް ކަރީމް ވަނީ ހާމަކޮށްފަ އެވެ.
ސީއެންއެމްއަށް މައުލޫމާތު ދެއްވަމުން ވެމްކޯގެ ޑީއެމްޑީ އިތުރަށް ވިދާޅުވީ ވެމްކޯއިން ކުނި ހުސްކުރަން ރަޖިސްޓްރީ ވެފަ ތިބި ރަށްރަށުގެ ތެރެއިން ރަޖިސްޓްރީ ވެފައި މިހާރު ތިބީ 26 ރަށްކަމަށެވެ. އެ 4 އަތޮޅުގަ ޖުމްލަ 40 ހަށް ވުރެއް ގިނަ ރަށް ހުންނާމެކަމަށައި ރަޖިސްޓްރީ ވެފައި އޮތް 26 ރަށުގެ ތެރެއިން، ތާވަލެއްގެ ދަށުން ހިދުމަތް ދެމުން އަންނަކަމަށްވެސް ކަރީމް ވިދޅުވި އެވެ.
ރ. އަލިފުށި:. -- ފޮޓޯ: އައިލްސް.އެމްވީ
އަދި އެ ހިދުމަތް ދޭ އިރުގަ ވެމްކޯއިން ރަށްރަށު ލެވެލްގައިވެސް ކުނި މެނޭޖްކުރުމަށްވެސް ވަރަށް ބޮޑަށް އެބަ ހިތްވަރުދެމުންދާކަމަށްވެސް ޑީއެމްޑީ ފާހަގަކުރެއްވި އެވެ. އެގޮތުން ފަތް ކުނޑީގެ ބާވަތްތަށް ވެމްކޯއަކުންނެއް ނުނަގާނެ ކަމަށާއި ހަމައެކަނި ނަގާނީ ބަލްކީ ވޭސްޓް ކަމަށް ކަރީމް ވިދާޅުވި އެވެ.
ފަތް ކުނޑިއަކީ ރަށުން ބޭރުވުމަށްވުރެއް ރަށަށް އޭގެ ފައިދާއިން މަންފާކުރާނެ އެއްޗެއްކަމަށްވެސް ޑީއެމްޑީ ވިދާޅުވި އެވެ. އެގޮތުން އޭގެން ގަސް ކާނާ ހެދުން ކަހަލަ ބައިވަރު މަސައްކަތް ކުރެވިދާނެ ކަމަށާއި ފަތްކުނޑި ނުނެގި ނަމަވެސް ނަަމަވެސް ދެން އެހެން ބާވަތުގެ ކުނިތަށް ނަގައިދޭނެކަމަށް ޑީއެމްޑީ ވިދާޅުވި އެވެ.
