ރަށްރަށުން ކަރަންޓް ކެނޑޭ މައްސަލައިގައި ވ. ރަކީދޫގެ މީހަކު ކުރި ސުވާލެއްގެ ޖަވާބުގައި ރައީސް ވިދާޅުވީ ވެރިކަމާ ހަވާލުވެވަޑައިގަތް އިރު، ފެނަކަ ދަރުވާލާފައި އޮތުމުގެ އިތުރަށް އެންމެ ބޮޑު މައްސަލަ އަކީ އިންޖީނުގެތަކުގެ ހާލަތު ދަށްވުން ކަމަށެވެ.

އެގޮތުން ޖެނެރޭޝަން ސެޓްތަކާއި އެހެނިހެން އާލާތްތައް އިންޖީނުގެތަކުގައި ނުބަލަހައްޓައި މަރާމާތު ނުކޮށް ހުރިކަމަށް ރައީސް ވިދާޅުވި އެވެ.

ރަށްރަށުން ކަރަންޓު ކެނޑުމުގެ މައްސަލަ ދިމާވުން މިފަހަކަށް އައިސް ވަނީ ވަރަށް އާންމުވެފަ އެވެ. ބައެއް ރަށްރަށުގައި މި މައްސަލަ ރޯދަ މަހު ވެސް ދިމާވެ އެވެ.

ފެނަކައިން ފޯރުކޯށްދޭ ހިދުމަތް ހަރުދަނާކުރުމުގެ މަސައްކަތް މިހާރުކުރަމުންގެންދާއިރު، އައްޑޫ ސިޓީގެ ސެންޓްރަލް ޕަވަރ ޕްލާންޓްގެ 1 މެގަވޮޓްގެ ޖެނެރޭޓަރަކަށް މައްސަލަ ޖެހިގެން މިދިޔަ މަހު އެ ރަށަށް ވަނީ އާ ޖަނެރޭޓަރެއް ގެންގޮސްފަ އެވެ. 

އަދި ކުޅުދުއްފުށި ސިޓީގެ ކަރަންޓު މައްސަލަ ޙައްލުކުރުމަށް ވެސް 800 ކިލޯ ވޮޓުގެ ޖެނަރޭޓަރެއް އިންސްޓޯލްކުރުމުގެ މަސައްކަތްވެސް ފެނަކަ ކޯޕަރޭޝަނުން ވަނީ ފަށާފަ އެވެ.