ރައީސް މުއިއްޒު ވަނީ ލ އަތޮޅަށް ކުރެއްވި ދަތުރުފުޅުގައި ހައްދުންމަތީ އަތޮޅު ކައުންސިލާ ބައްދަލުކުރައްވައި، ތަރައްގީގެ މުހިންމު ކަންކަމާގުޅޭގޮތުން މަޝްވަރާކުރައްވާފައެވެ. މި ބައްދަލުކުރެއްވުން އޮތީ މިއަދު ހެނދުނު ފޮނަދޫ އިޖުތިމާއީ މަރުކަޒުގައެވެ.
ސިއްހީ ހިދުމަތުގެ ފެންވަރު ރަނގަޅު ކުރެއްވުމުގެ އިތުރުން މި ބައްދަލުކުރެއްވުމުގައި ކައުންސިލް މެންބަރުން ވަނީ އަތޮޅުގައި މަސްވެރިންނަށް މަސްކިރުމުގައި ދިމާވެފައިވާ ދަތިތައް ހައްލުކުރުމާއި، ދަތުރުފަތުރާއި ތައުލީމީ ނިޒާމުގެ ފެންވަރު ރަނގަޅު ކުރުމާބެހޭގޮތުން މަޝްވަރާކުރައްވާފައެވެ. އަދި އަތޮޅުގައި އެކި މަސައްކަތްތަކަށް ދޫކޮށްފައިވާ ރަށްތަކާއި އަތޮޅުގައި ފަތުރުވެރިކަން އިތުރަށް ތަރައްގީކުރުމަށް ކައުންސިލުން ގެންގުޅޭ ވިސްނުން ރައީސްއާ ހިއްސާކުރެއްވިއެވެ.
މީގެ އިތުރުންވެސް އަތޮޅުގެ އެކި ރަށްރަށަށް ދިމާވެފައިވާ އެކިއެކި މައްސަލަތަކަށް ހައްލު ހޯއްދަވައިދެއްވުމާ ބެހޭގޮތުން ކައުންސިލްގެ ފަރާތުން ވަނީ މަޝްވަރާކުރައްވާފައެވެ.
މިބައްދަލުކުރެއްވުމުގައި ބައިވެރިވެވަޑައިގެންނެވި ވަޒީރުން މެދުވެރިކުރައްވައި ރައީސް ވަނީ ކައުންސިލުން ފާހަގަކުރެއްވި މުހިންމު ކަންތައްތަކުގެ އެންމެ ފަހުގެ މައުލޫމާތު ހިއްސާކުރައްވާފައެވެ. އަދި ކައުންސިލްގެ ފަރާތުން ފާހަގަކުރެއްވި ކަންބޮޑުވުންތައް ހައްލުކޮށްދެއްވުމަށް މަސައްކަތް ކޮށްދެއްވާނެކަމުގެ ޔަގީންކަން ރައީސް ދެއްވާފައިވެއެވެ.
