މިއަދު ހެނދުނު ފެށިގެން މާލެއަށް އަންނަނީ ވިއްސާރަކުރަމުންނެވެ. އަދި އަސުރުގެ ފަހުން ވިދާ ގުގުރުމާއި އެކު މާލެއަށް އަންނަނީ ވަރަށް ބޯކޮށް ވާރޭ ވެހެމުންނެވެ.
ހުއްޓާ ނުލާ ވަރަށް ބޯކޮށް ވާރޭ ވެހުމުން މާލޭގެ ގިނަ މަގުތަކުގައި ވަނީ ފެންބޮޑުވެފަައެވެ. އަދި ބައެއް ސަރަހައްދުތަކުގައި ވަރަށް ފެންބޮޑުވެ ގެތަކަށް ފެނުގެ އަސަރު އަންނަނީ ކުރަމުންނެވެ.
ފެން ބޮޑުވެފައިވާ ހިސާބުތަކުގައި ފުލުހުން އެހީތެރިކަން ފޯރުކޮށްދެނީ
އެންޑީއެމްއޭއިން ބުނީ މާލެއަށް ބޯކޮށް ވާރޭވެހި ފެންބޮޑުވެފައިވާތީ އެކަމަށް އިޖާބަ ދިނުމުގެ މަސައްކަތް ކަމާއިގުޅޭ އިދާރާތަކާއި ގުޅިގެންކުރަމުން އަންނަކަމަށެެވެ. މިހާތަނަށް 57 ތަނަކުން ރިޕޯޓުކޮށްފައިވާކަމަށާއި މި ތަންތަނުގައި ވެލިބަސްތާ ޖެހުމުގެ މަސައްކަތް ކަމާއިގުޅޭ އިދާރާތަކާއި ގުޅިގެން ކުރަމުންދާކަމަށްވެސް އެންޑީއެމްއޭއިން ބުނެއެވެ.
މާލޭ މަގުތަކުން ފެން ހިންދުމުގެ މަސައްކަތް ސިފައިން ކުރަނީ
ރާއްޖެއަށް ކުރަމުންދާ ވިއްސާރައާ ގުޅިގެން މޫސުމާއި ބެހޭ އިދާރާއިން ވަނީ ހއ. އަތޮޅުން ފެށިގެން ފ.އަތޮޅާ ހިސާބަށް ރީނދޫ އެލާޓް ނެރެފައެވެ. އެ އިދާރާއިން ބުނީ ގުގުރުމާއި އެކު ބޯކޮށް ވާރޭވެހޭނެކަމަށެވެ.
މިދިޔަ ޑިސެމްބަރުމަހުގެ ތެރޭގައިވެސް ރާއްޖެއަށް ބޯކޮށް ވާރޭވެހި މާލެއާއި ބައެއް ރަށުގައި ވަނީ އާއްމުންގެ މުދަލާއި އިމާރާތްތަކަށް ގެއްލުންވެފައެވެ. މާލޭ ގިނަ ގެތަކަށް ފެންވަދެ ބައެއް އާއިލާތަކަށް ބޮޑެތި ގެއްލުންތައް ލިބުނެވެ.
