އެމްޕީއެލްއިން ބުނީ މި ދެ ސްޓޯރޭޖް ކޮންޓެއިނަރު ހަދިޔާކުރީ އައްޑޫ އީކުއެޓޯރިއަލް ހޮސްޕިޓަލްގައި ދިމާވެފައިވާ ސްޓޯރޭޖްގެ ދަތިކަން ހައްލުކުރުމަށް އެހީތެރިވުމުގެ ގޮތުން، އެ ކުންފުނީގެ ސީއެސްއާރްގެ ދަށުން ކަމަށެވެ. އަދި ހަދިޔާކޮށްފައިވަނީ 40 ފޫޓުގެ ދެ ކޮންޓެއިނަރު ކަމަށް އެ އެމްޕީއެލްއިން މައުލޫމާތުދެ އެވެ.
މި ސްޓޯރޭޖް ކޮންޓޭނަރުތައް އައްޑޫ އެކުއެޓޯރިއަލް ހޮސްޕިޓަލަށް ރަސްމީކޮށް ހަދިޔާކުރުމަށް ބޭއްވި ބައްދަލުވުމުގައި އެމްޕީއެލްގެ ސީއީއޯ މުހައްމަދު ވަޖީހް އާއި އައްޑޫ އީކުއެޓޯރިއަލް ހޮސްޕިޓަލްގެ ސީއީއޯ ޑރ. އިބްރާހިމް ޔާސިރު އަހްމަދުގެ އިތުރުން އެ ހޮސްޕިޓަލާއި އެމްޕީއެލްގެ އިސްވެރިން ބައިވެރިވެވަޑައިގަތެވެ.
ދެކުނުގައި ރައްޔިތުންނަށް ހިދުމަތްދޭ އެންމެ ބޮޑު ހޮސްޕިޓަލް ކަމަށްވާ އައްޑޫ އެކުއެޓޯރިއަލް ހޮސްޕިޓަލަކީ 102 އެނދުގެ ޓާޝިއަރީ ހޮސްޕިޓަލެކެވެ.
ނަމަވެސް ހޮސްޕިޓަލްގެ ހިދުމަތުގެ ފެންވަރާއިމެދު އާންމުން ދަނީ ކަންބޮޑުވުން ފާޅުކުރަމުންނެވެ.
