ދައުލަތުގެ މީޑިއާއިން ގެނެސްދޭ ހިދުމަތްތެރިން ޕްރޮގްރާމުގައި ވާހަކަ ދައްކަވަމުން ހަލީލް ވިދާޅުވީ ނޫސްވެރިކަމުގެ މިނިވަންކަމުގެ ދުވަސް ފާހަގަކުރަމުން އަންނައިރު، ރާއްޖޭގައި ނޫސްވެރިންނަށް ހިޔާލު ފާޅުކުރުމުގެ މިނިވަންކަން ވަރަށް ބޮޑަށް ތަނަވަސްކޮށްދެވިފައިވާ ކަމަށެވެ.
ނޫސްތަކާއި ސައިޓުތައް ހިންގާއިރު ޒިންމާދާރުވާން ޖެހޭކަން ފާހަގަކުރައްވާ ހަލީލް ވިދާޅުވެފައި ވަނީ ސަރުކާރަށް ފާޑު ކިޔަން ވެސް ކެރިގެން ނިކުންނަންވީ ކަމަށާއި އެ މަސައްކަތް ކުރުމުގައި ތެދު މައުލޫމާތު ފެތުރުމަކީ މުހިންމު ކަމެއް ކަމަށެވެ. ކޮން ބައެއްކަން ނޭނގޭ ގޮތަށް ހަބަރު ފެތުރުމަށް ވުރެ، އެކަން ކުރަނީ ކޮން ބައެއްކަން އެނގިގެން އެކަމެއް ކެރިގެން ކުރުން މާ ރަނގަޅުވާނެ ކަަމަށް އޭނާ ވިދާޅުވި އެވެ.
ހަލީލް ވިދާޅުވި ގޮތުގައި ބްލެކް ލިސްޓެއް އޮތް ކަމަށް ދައްކަން ބައެއް މީޑިއާތަކުން މަސައްކަތް ކުރި ނަމަވެސް ރައީސް ޑރ. މުހައްމަދު މުއިއްޒުގެ އެޑްމިނިސްޓްރޭޝަނުގައި މީޑިއާގެ ބްލެކް ލިސްޓެއް ނޯންނާނެ ކަމުގަ އެވެ. އެމީހަކު ބޭނުން އެއްޗެއް ލިޔެ، ބޭނުން ވާހަކައެއް ދައްކަމުން އަންނައިރު އެކަމާ ގުޅިގެން ގެންދިޔައީ ކޮންތާކަށްތޯ ނުވަތަ އެޅީ ކޮން ފިޔަވަޅެއްތޯ އޭނާ ސުވާލު އުފެއްދެވި އެވެ.
ހަލީލު ވިދާޅުވެފައި ވަނީ މި އެޑްމިނިސްޓްރޭޝަނުގެ ވިސްނުން ހުރީ ނޫސްވެރިކަމުގެ ދާއިރާ މިހާރަށް ވުރެ ބޮޑަށް ކުރިއަރުވަން ކަމަށެވެ. އެގޮތުން މި ދާއިރާއިން ތަމްރީނުތައް ހިންގައި، މީޑިއާތަކަށް އާމްދަނީ ލިބޭނެ ގޮތްތައް ފަހިކޮށްދޭން ސަރުކާރުން މަސައްކަތް ކުރާނެ ކަމުގައި ހަލީލް ވިދާޅުވި އެވެ.
ނޫސްވެރިކަމުގެ ދާއިރާ އަދި ބްރޯޑްކާސްޓިން ދާއިރާގައި ގިނަ ދުވަސްތަކެެއް ވަންދެން މަސައްކަތްކުރެއްވި ހަލީލަކީ ޕީއެސްއެމް ނިއުސް ޗެނަލް އުފެއްދުމުގައި އިސް ދައުރެއް އަދާކުރެއްވި އަދި އޭރު އެ ޗެނަލްގެ މެނޭޖިން ޑިރެކްޓަރުގެ މަގާމުގައި ހުންނެވި ފަރާތެވެ. އޭނާ މިހާރު އަދާކުރައްވަމުން އަންނަނީ މިނިސްޓަ އެޓް ދަ ޕްރެޒިޑެންޓްސް އޮފީސް ފޮ ސްޓްރެޓީޖިކް ކޮމިއުނިކޭޝަންގެ މަގާމެވެ.
