ރަސްމީ ކޯޓާގެ ތެރެއިން ރާއްޖެއަށް ކޮންމެ އަހަރަކުވެސް ލިބެނީ 1000 ޖާގައެވެ. އެހެންނަމަވެސް ކޮންމެ އަހަރަކުވެސް އެ އަދަދު އިތުރުކުރެވޭތޯ ކޮންމެ ސަރުކާރަކުން މަސައްކަތް ކުރެއެވެ.
މި އަހަރުގެ ހައްޖުގެ ތައްޔާރީތަކާއި ގުޅޭ ގޮތުން ވާހަކަ ދައްކަވަމުން އިސްލާމީ ކަންތައްތަކާއި ބެހޭ ވަޒީރު ޑރ. މުހައްމަދު ޝަހީމް އަލީ ސައީދު ވިދާޅުވީ މިއަހަރު ލިބުނު ކޯޓާ އިތުރުކުރުމުގެ މަސައްކަތް ސަރުކާރު ކުރަމުން އަންނަކަމަށެވެ. އެގޮތުން ކޯޓާ އިތުރުކޮށް ދިނުމަށް އެދި ރައީސް ޑރ. މުހައްމަދު މުއިއްޒު ސައުދީ ސަރުކާރަށް ސިޓީއެއް ފޮނުވާފައިވާކަން ވަޒީރު ފާހަގަކުރެއްވިއެވެ.
ޝަހީމް ވިދާޅުވީ ކޯޓާގެ ކަންކަން ސައުދީން މިހާރު ކުރަމުން އަންނަނީ ކުރިން އެކަން ކުރިގޮތުގެ ބަދަލުގައި ވަކި ނިޒާމެއްގެ ތެރެއިން ކަމަށެވެ. އެގޮތުން މިހާރު ތަނުގައި ހުރި މިންވަރަށް ވުރެ އިތުރަށް ޖާގަ ނުދެވޭނެ ގޮތްތަކަށް އިންތިޒާމުތައް ހަމަޖައްސާފައިވާކަމަށް ޝަހީމް ވިދާޅުވިއެވެ. ގައުމުތަކަށް ދީފައިވާ ކޯޓާތަކުން ބޭނުން ނުކޮށް ހުރިނަމަ ހައްޖު ގާތްވުމުން އިތުރު ކޯޓާ ލިބިދާނެކަން ސައުދީ ހައްޖު މިނިސްޓްރީން އަންގާފައިވާކަމަށް ވަޒީރު ވިދާޅުވިއެވެ.
މިއަހަރު ރާއްޖެއަށް ލިބނު ހައްޖު ކޯޓާ އެއްކޮސް ހައްޖު ކޯޕަރޭޝަނަށް ދިނުމަށް ސަރުކާރުން ވަނީ ނިންމާފައެވެ. އެހެންނަމަވެސް އިތުރު ކޯޓާ ލިބިއްޖެނަމަ ހައްޖު ކޯޕަރޭޝަނުން ހައްޖަށް ގެންދާ އަގަށް ގެންދަން އެއްބަސްވާ ޖަމާއަތްތަކަށް ފުރުސަތު ދިނުމުގެ ވިސްނުން އޮތްކަމަށް މީގެކުރިން ޝަހީމް ވަނީ ވިދާޅުވެފައެވެ.