ހޯމްލޭންޑް ސެކިއުރިޓީ އެންޑް ޓެކްނޯލޮޖީ މިނިސްޓްރީން ބާއްވާ ނޫސްވެރިންގެ ބައްދަލުވުމުގައި އިހުސާން ވިދާޅުވީ ޖިނާއީ ކުށުގެ ޒިންމާ ނަގަން ޖެހޭ އުމުރަކީ މިހާރު 15 އަހަރު ކަމަށްވީ ނަމަވެސް އެ އުމުރު 12 އަހަރަށް ދަށް ކުރުމަށް ދިވެހި ސަރުކާރުން ނިންމާފައިވާ ކަމަށެވެ.
އެކަން ކުރުމަށް ނިންމާފައި ވަނީ ކުޑަކުދިންގެ އަދުލުގެ ނިޒާމު ފުރިހަމަ ކުރުމަށް ކަން ފާހަގަކުރައްވާ އިހުސާން ވިދާޅުވެފައި ވަނީ އެކަމަށް ގެންނަން ޖެހޭ ގާނޫނީ ބަދަލު ގެނައުމުގެ މަސައްކަތް މިހާރު ފަށާފައިވާ ކަމަށެވެ.
އިހުސާން ވިދާޅުވި ގޮތުގައި އުމުރުފުރާ ދަށް ކުރުމުގެ ސަބަބުން ގާނޫނީ ގޮތުން އެފަދަ ކުދިންނަށް ހިންގަން ޖެހޭ ރިހެބިލިޓޭޝަން ޕްރޮގްރާމުތައް ހިންގުމުގެ ބާރު ލިބިދޭނެ ކަމުގަ އެވެ. ސިފައިންނާއި ފުލުހުންގެ އިތުރުން ކަމާ ބެހޭ މިނިސްޓްރީތައް ގުޅިގެން ޕްރޮގްރާމުތައް ހިންގުމަށް ހަމަޖެހިފައި ވަނީ އެކަމަށް ހާއްސަ ކުރެވިފައިވާ ރަށަކަށް އެ ކުދިން ގެންދިއުމަށް ފަހުގައި ކަމަށް މިނިސްޓަރު ވިދާޅުވި އެވެ.
އިހުސާން ވިދާޅުވީ ކުށުގެ ވެށީގައި އުޅޭ ކުޑަކުދިން އިސްލާހުކުރަން ގެންދިއުމަށް ނިންމާފައި ވަނީ "ހޯޕް އައިލެންޑް" އަށް ކަމަށާއި އެ ރަށުގައި އެ ކުދިންނަށް ދީނީ ތައުލީމާއި ރަސްމީ ތައުލީމާއި ކުޅިވަރާ އަދި ސައިކޯ ސޯޝަލް އިންޓަވެންޝަން ޕްރޮގްރާމުތައް ހިންގާނެ ކަމަށެވެ.
