ފުުލުހުން މިއަދު އާއްމުކުރި ތަފާސް ހިސާބުތަކުން ދައްކާގޮތުން މިދިޔަ އަހަރުގެ ރޯދަމަހުގެ ފުރަތަމަ ހަފުތާގައި މާލެ ސަރަހައްދުގައި ވަނީ 90 އެކްސިޑެންޓު ހިނގާފައެވެ. މިއަހަރުގެ ރޯދައިގެ ފުރަތަމަ ހަފްތާގައި މާލޭ ސަރަހައްދުގައި 107 އެކްސިޑެންޓް ވެފައިވާކަމަށް ފުލުހުން ބުނެއެވެ. އެއީ މިދިޔަ މަހުގެ 18އިން 24 ގެ ނިޔަލަށެވެ.
ފުލުހުންގެ ރިކޯޑްތައް ދައްކާގޮތުން މާލޭ ސަރަހައްދުގައި އެންމެ އެކްސިޑެންޓް ގިނައީ މަޖީދީ މަގާއި ސިނަމާލެ ބްރިޖާއި ހައިވޭގައެވެ. އެގޮތުން ސިނަމާލެ ބްރިޖާއި ހައިވޭގައި 19 އެކްސިޑެންޓް ހިނގާފައިވާއިރު މަޖީދީމަގުގައިވެސް ރޯދަމަހުގެ ފުރަތަމަ ހަފްތާގައި ވަނީ 19 އެކްސިޑެންޓް ހިނގާފައެވެ.
މިދިޔަ ރޯދައިގެ ފުރަތަމަ ހަފުތާގައި މަޖީދީމަގުގައި ހިނގީ 14 އެކްސިޑެންޓެކެވެ. ސިނަމާލެ ބުރިޖުގައި އެ މުއްދަތުގައި ވަނީ، 16 އެކްސިޑެންޓު ހިނގާފައެވެ.
ދެން އެންމެ ގިނައިން އެކްސިޑެންޓް ހިނގާފައިވަނީ ހުޅުމާލޭ ފޭސް އެކަކާއި ދޭއްގައެވެ. ފޭސް އެކެއްގައި 17 އެކްސިޑެންޓް ހިނގާފައިވާއިރު ފޭސް 2 ގައި ވަނީ 16 އެކްސިޑެންޓް ހިނގާފައެވެ.
މިއަހަރުގެ ރޯދަމަހު އެންމެ އެކްސިޑެންޓް މަދުކަމަށް ފުލުހުންގެ ހިސާބުތަކުން ދައްކަނީ ދާދީ ފަހުން ތަރައްގީކޮށް ހުޅުވި ބޮޑުތަކުރުފާނު މަގުގެ ލޯކަލް މާރުކޭޓް ހުންނަ ސަރަހައްދުގައެވެ. އެ ސަރަހައްދުގައި ހިނގީ އެންމެ ދެ އެކްސިޑެންޓްކަމަށް ފުލުހުން ބުނެއެވެ.
