"ސީއެންއެމް" އިން ކުރި ސުވާލަކަށް ޖަވާބުދެއްވަމުން ހޯމް މިނިސްޓަރު އަލީ އިހުސާން ވަނީ ކުރީ ސަރުކާރުން އިންދިރާ ޕްރޮޖެކްޓްގެ ނަމުގައި ރާއްޖޭގައި 60 އަކަށް ޕޮލިސް ސްޓޭޝަން އެޅުމުގެ މަސައްކަތުގެ ވާހަކަ ފާހަގަކޮށްފަ އެވެ. އެގޮތުން ތަހުގީގަށް ފަހު އެ ކުންފުނި މިހާރު ވަނީ ދެނެގަނެވިފައިކަަމަށާއި އަދި އެކަމާ ބެހޭ އެގްރީމަންޓް އާއްސަ އޮތީ ޖޮއިންޓް ވެންޗާ ކުންފުންޔެއް ގޮތައްކަމަށް އިހުސާން ވިދާޅުވި އެވެ.
މިނިސްޓަރު ވަނީ އެކަމުގައި މިހާތަަނަށް ލިބިފައިވާ މައުލޫމާތު ހިއްސާކުރައްވާފަ އެވެ.
މީގެ އިތުރުން މިނިސްޓަރު ވަނީ މިމައްސަލަ މިހާރުވެސް ވަނީ ފުލުންނަށް ޓާސްކްކޮށްފައި ކަމަށް ފާހަގަކޮށް އޭގެތެރެއިން އެއްވެސް ކަހަލަ ކޮރަޕްޝަނަށް މަގުފަހިވާކަމެއް އޮތްތޯ ބެލުމަށްފަހު އެ މައްސަަލަ އެންޓި ކޮރަޕްޝަން ކޮމިޝަން (އޭސިސީ)އަށް ހުށަހަޅުއްވާނެކަމަށް ވިދާޅުވެފަ އެވެ.
މިނިސްޓަރު ވިދާޅުވީ މިހާރު ކަށަވަރުވާގޮތުންނަމަ އެ ކުންފުނީގެ އެކައުންޓަށް މިހާރު ވާނީ 3.6 މިލިއަން ޑޮލަރު ޖަމާކޮށްފައިކަަމަށެވެ. އަދި އެފަރާތުން ރާއްޖޭގެ ސަރުކާރުގެ ފަރާތުން އެ ފައިސާ ލިބިފައިވާކަަމށް އެއްބަސްވާކަމަށްވެސް މިނިސްޓަރު ވިދާޅުވި އެވެ.
މީގެ އިތުރުން މިހާރު އޮތް ގާނޫނީ މައްސަލަ އަކީ އެމީހުންގެ ޖޮއިންޓް ވެންޗާ ރޫޅި ކުރިއަށް ދާނީ ކޮން ކުންފުންޔަކާ އެކު ތޯ ބެލުންކަމަށް މިނިސްޓަރު ފާހަގަކުރެއްވި އެވެ.
ރައީސް ސޯލިހުގެ ސަރުކާރުގައި 61 ރަށެއްގައި ޕޮލިސް ސްޓޭޝަންތައް އެޅުމަށް ހަވާލުކޮށްފައިވަނީ އިންޑިއާގެ ކުންފުންޏެއް ކަމަށްވާ އޭބީއެލް އިންދިރާ ޕްރޮޖެކްޓްސްއާ އެވެ. މި މަޝްރޫގެ އަގަކީ 48 މިލިއަން ޑޮލަރެވެ. 2021 ވަނަ އަހަރު އެ ކުންފުންޏާ މި މަސައްކަތް ހަވާލުކޮށްފައިވަނީ ދެ އަހަރުގެ ތެރޭގައި ނިންމާ ގޮތަށެވެ.
އޭގެފަހުން ކުރީ ސަރުކާރުން ޕޮލިސްޓޭޝަންތަކެއް އެޅުމަށް ކަމަށް ބުނެ އިންޑިއާ ކުންފުންޏަށް ދިން 3.6 މިލިއަން ޑޮލަރު ގެއްލުނު މައްސަލައެއް ބެލުމަަށް އެދި މި ސަރުކާރުގެ ހޯމް މިނިސްޓްރީން ވަނީ ނިމުނު މާޗް މަހު ފުލުހަށް ހުށަހަޅައިފި އެވެ.
މާޗް މަހު މިނިސްޓްރީން ބުނީ އޭގެ ފަހުން މިހާތަނަށްވެސް އެ ކުންފުނި ވީ ތަނެއް، އެ ކުންފުންޏާ ވާހަކަ ދައްކަން ޖެހޭ މީހެއް އަދި ކުންފުނީގެ ފަރާތުން، ޕޮލިސް ސްޓޭޝަންތައް އަޅަން ކުރިއަށް ދާން ޖެހޭ ގޮތެއްވެސް ހޯދިފައި ނުވާކަމަށެވެ.
