ހިނގަމުން މިދާ 19 ވަނަ މަޖިލީހުގެ އެންމެ ފަހު ޖަލްސާ މާދަމާއަށް ތާވަލުކޮށްފައިވާއިރު، މިއީ 2019 ވަނަ އަހަރުގެ މެއި މަހުގެ 28 ވަނަ ދުވަހު ހުވައި ކުރި މަޖިލީހެވެ.
ހިނގަމުން މިދާ މަޖިލީހުގެ ދައުރު ފެށީ ބޮޑު އަގްލަބިއްޔަތަކާ އެކު އޭރު ވެރިކަން ކުރި އެމްޑީޕީގެ ސުޕަ މެޖޯރިޓީ އާއެކު އެވެ. އެހެންނަމަވެސް ސިޔާސީ ކަންކަމަށް އައި ބަދަލުތަކާ އެކު މަޖިލީހުގައި އެމްޑީޕީއަށް އޮތް ބާރު ކުޑަވެ، އަދި ފަހުން ވެރިކަން ވެސް ގެއްލުނީ އެވެ.
މަޖިލީހުގެ މި ދައުރުގެ ފުރަތަމަ ރައީސްއަކީ ރައީސް މުހައްމަދު ނަޝީދު އެވެ. އަދި ނާއިބު ރައީސްއަކީ އީވާ އަބްދުﷲ އެވެ. އެހެންނަމަވެސް ސިޔާސީ ހިޔާލު ތަފާތުވުންތަކާއި ކޯޅުންތަކަށް ފަހު ދެ ބޭފުޅުން ވެސް ރިޔާސަތުން އިސްތިއުފާ ދެއްވި އެވެ. މީގެ ތެރެއިން ރައީސް ނަޝީދު އަންނަ ދައުރަށް ކުރިމަތި ނުލައްވަން ނިންމެވިއިރު، އީވާއަށް އިންތިހާބުގައި ބޮޑު ނާކާމިޔާބީއަކާ ކުރިމަތިވި އެވެ.
ރައްޔިތުންގެ މަޖިލީހުގެ މިހާރުގެ ރައީސް މުހައްމަދު އަސްލަމް އަދި މިހާރުގެ ނާއިބް ރައީސް އަހްމަދު ސަލީމަކަށް ވެސް އަންނަ ދައުރުގެ މަޖިލީހުން ފުރުސަތެއް ލިބިވަޑައެއް ނުގެންނެވި އެވެ.
ހިނގަމުން މިދާ 19 ވަނަ މަޖިލީހުގެ ފަހު ޖަލްސާ މާދަމާއަށް ތާވަލުކޮށްފައިވާއިރު، ހިނގަމުން މިދާ މަޖިލީހަށް އިންތިހާބުވެ ވަޑައިގެންނެވި ދެ މެންބަރަކު އަވަހާރަވެފައިވެ އެވެ.
ނަވާރަވަނަ މަޖިލީހުގެ ފަހު ޖަލްސާ މާދަމާއަށް އެޖެންޑާކޮށްފައިވާއިރު، މާދަމާގެ ޖަލްސާގައި މެންބަރުންނަށް ވާހަކަ ދެއްކެވުމަށް ފުރުސަތު ދިނުމަށް އެޖެންޑާގައި ހިމަނާފައިވެ އެވެ.
