ދިވެހި ނޫސްވެރިން ތަމްރީނުކުރުމަށް (އެމްއެމްސީ) އިން ގެންދާ މަސައްކަތްތަކުގެ ތެރެއިން، ޕާކިސްތާންގައި ތަޢުލީމީ ހިދުމަތްދޭ މުއައްސަސާތަށް މެދުވެރިކޮށް ރާއްޖޭގެ ނޫސްވެރިންނަށް ތަމްރީނު ފުރުސަތުތަކެއް ހޯދައި ދިނުމަށް މޯލްޑިވްސް މިޑިއާ ކައުންސިލުން ދަ ހައި ކޮމިޝަން އޮފް ޕާކިސްތާން އާއި މަޝްވަރާކޮށްފި އެވެ.
މި ބައްދަލުވުމުގައި މޯލްޑިވްސް މީޑިއާ ކައުންސިލުގެ ފަރާތުން ބައިވެރިވެ ވަޑައިގަތީ، ކައުންސިލުގެ ރައީސް އަލްފާލިލް އަހުމަދު މުސްތަފާ، މެންބަރު އަލީ ނިޝާން، މެންބަރު މުހައްމަދު އަފްރާހް، އަދި ކައުންސިލުގެ ސެކްރެޓަރީ ޖެނެރަލް ޑރ. އިބްރާހީމް ސަމީރު އެވެ. އަދި ޕާކިސްތާން އެމްބަސީގެ ފަރާތުން ބައިވެރިވެވަޑައިގަތީ އެމްބަސެޑަރު ވައިސް އެޑްމިރަލް (ރިޓަޔާޑް) މުހައްމަދު ފައްޔާޒް ގިލާނީ އަދި ޑެޕިއުޓީ ހެޑް އޮފް މިޝަން ޒުލްޤްރްނައިން އަހުމަދު އެވެ.
ހައިކޮމިޝަނަރާއެކު އިއްޔެ ބޭއްވި ބައްދަލުވުމުގައި ދިވެހި ނޫސްވެރިން ތަމްރީން ކުރުމަށް ޕާކިސްތާންއަށް ޖޫން 2024 ގައި ދިޔުމަށް ހަމަޖެހިފައިވާކަމަށް ހައިކޮމިޝަނަރު ޔަގީންކަންދެއްވި އެވެ.
މި ތަމްރީންގައި ބައިވެރިވާ ނޫސްވެރިން ޕާކިސްތާނުގެ މަޝްހޫރު ބައެއް މީޑިއާ ހައުސްތަކަށް ޒިޔާރަތް ކުރުމުގެ އިތުރުން ނޫސްވެރިކަމާއި މީޑިއާގެ ދާއިރާގެ ސެޝަންތަކުގައި ބައިވެރިވާނެ އެވެ.
މީގެ އިތުރުން، އެމްއެމްސީ އާއި ޕާކިސްތާނުގެ މިނިސްޓްރީ އޮފް އިންފޮމޭޝަން އެންޑް ބްރޯޑްކާސްޓިން ގުޅިގެން މަސައްކަތް ކުރުމަށް އެއްބަސްވުމުގައި ސޮއިކުރުމުގެ މަސައްކަތް ކޮށްދެއްވާނެ ކަމުގެ ޔަގީންކަން ޕާކިސްތާނުގެ ހައިކޮމިޝަނަރު ދެއްވާފައި ވެއެވެ.
