ނިމިދިޔަ އެމްޑީޕީގެ ސަރުކާރުގެ ފަރާތުން މަނަދޫ ދާއިރާގެ މެމްބަރު އަހްމަދު ހާރޫން މި ބިލު މަޖިލީހަށް ހުށަހެޅީ އޮގަސްޓު 2021, ގަ އެވެ. މިއަދު ބޭއްވި 19 ވަނަ މަޖިލީހުގެ އެންމެ ފަހު ޖަލްސާގައި މި ބިލު ފާސްކުރީ 47 މެމްބަރުންގެ ވޯޓާއެކު އެވެ.
ބިލުގެ ނުވަ ވަނަ ބާބުގައި ގިނަ ކުށްތަކެއް ހިމަނައި، އެއަށް އަޅާނެ ފިޔަވަޅުތައް ހިމަނާފައިވެ އެވެ. ކޮމިޓީ މަރުހަލާގައި އޭގެ ތެރެއިން ބައެއް ކުށްތަކަށް އޮތް ޖޫރިމަނާ ކުރުމުގެ އަދަދު ބޮޑުކޮށްފައިވެ އެވެ.
ބިލުގައި ބުނެފައިވަނީ މިއިން ކުށެއް ކުރާ މީހެއްގެ އަދަބަކީ އެ އަމަލެއްގެ ކުޑަބޮޑު މިނަށް ބަލާ، 10،000ރ. 300،000ރ. އާ ދެމެދުގެ އަދަދަކުން ޖޫރިމަނާ ކުރުމެވެ.
އޭގެ އިތުރުން އެ އަމަލެއްގެ ސަބަބުން، މީހެއްގެ ސިއްހަތަށް ނުރައްކާތެރި ގެއްލުމެއް ލިބުމަށް މެދުވެރިވެއްޖެ ނަމަ ނުވަތަ މީހެއްގެ ފުރާނައަށް ނުރައްކާވެއްޖެ ނަމަ، އެ އަމަލެއް ހިންގި ފަރާތުގެ އަދަބަކީ، އެ އަމަލެއްގެ ކުޑަބޮޑުމިނަަށް ބަލައި، އެއް މިލިއަން ރުފިޔާއަށްވުރެ ބޮޑު ނޫން އަދަދަކުން ޖޫރިމަނާ ކުރުން ކަމަށް ބިލުގައި ބަޔާންކޮށްފައިވެ އެވެ.
ބިލު ގާނޫނަކަށް ވެގެން ދިއުމުން ކާބޯތަކެތި އުފައްދާ، ގުދަންކޮށް އަދި ވިއްކާ ތަންތަނުގައި ގެންގުޅޭ ކާބޯތަކެއްޗަކީ ސިއްހީ ގޮތުން އެކަށީގެންވާ، ރައްކާތެރި ތަކެތި ކަން ކަށަވަރުކުރުމަށްޓަކައި އަމަލުކުރަން ޖެހޭ އުސޫލުތަކާއި މިންގަނޑުތައް ކަނޑައެޅުމަށް ބޭނުންވާ ގާނޫނީ އޮނިގަނޑެއް ގާއިމު ކުރެވިގެންދާނެއެވެ.
މި ގާނޫނުގެ ދަށުން ރާއްޖެއަށް އެތެރެކޮށް ނުވަތަ އުފެއްދުމާއި ގަނެ ވިއްކުން މަނާވާނެ ތަކެތި
- ގަޑުބަޑުކޮށްފައިވާ ކާބޯތަކެތި ނުވަތަ ގަޑިބަޑުކުރުމަށް ބޭނުންކުރާ ބާވަތްތައް ނުވަތަ އެޑަލްޓްރަންޓް
- އަސްލު އޮޅޭ ގޮތަށް ލޭބަލްކޮށްފައިވާ ކާބޯތަކެތިި,
- މި ގާނޫނުގެ ދަށުން ވިޔަފާތި ކުރުން މަނާކޮށްފައިވާ ކާބޯތަކެތި, އަދި,
- ސިއްހަތަށް ގެއްލުމެއް ދޭ ކާބޯތަކެއްޗެވެ.
ބިލުގައި ހުރި ކަންކަމަށް އަމަލުކުރަން އޮތީ، ބިލު ތަސްދީގުކޮށް ސަރުކާރުގެ ގެޒެޓްގައި ޝާއިރު ކުރާ ތާރީހުން ފެށިގެން ތިން މަސް ދުވަސްވުމާއެކު އެވެ.
މި ގާނޫނަށް އަމަލު ކުރަން ފެށުމާ އެކު، 1978 ވަނަ އަހަރު ވުޖޫދުކޮށްފައިވާ ހޮޓާހޮޓަލާއި ކާބޯތަކެތި ވިއްކާ ތަންތަނާއި ވިއްކުމަށްޓަކައި ކާބޯތަކެތި ތައްޔާރުކުރާ ތަންތަން ސާފުތާހިރުކޮށް ބެހެއްޓުމާ ގުޅޭ ދުވަސްވީ ގާނޫނު އުވޭނެ އެވެ.
