ފަލަސްތީނުގެ ގާޒާގެ މުސްލިމުން ނެތިކޮށްލަން ޔަހޫދީ ފައުޖުން ހިންގަމުންދާ ލާއިންސާނީ އުދުވާނުގެ ދަށުން އެ ސަހަރުގެ އުތުރުގައިވާ ރަށްތަކަށް ބަރުހަތިޔާރާއި އަސްކަރީ ޓޭންކުފަހަރު އަލުން ފޮނުވައި, އުދުވާން މިހާރު ވަނީ ފުޅާކޮށްފަ އެވެ. އަސްކަރީ ޓޭންކުތަކާ އެކު ޔަހޫދީ ފައުޖުން ވަނީ ގާޒާގެ އިރުއުތުރުގައި އޮތް ޖަބާލިޔާ ރެފިއުޖީ ކޭމްޕު އޮންނަ ސަރަހައްދަށް ވަދެފަ އެވެ.
ޔަހޫދީންގެ ފައުޖުތަކުން ވަނީ ޖަބަލިއާއާއި ބައިތު ލާހިޔާގައި ތިބި އާންމުން އެ ސަރަހައްދު ދޫކޮށް ދިއުމަށް މީގެކުރިން އަންގައިފަ އެވެ.
ޖަބަލިއާ އަކީ ގާޒާގެ ތާރީހީ، އަށް ރެފިއުޖީ ކޭމްޕްގެ ތެރެއިން އެންމެ ބޮޑު ކޭމްޕެވެ. އެތަނުގައި ދިރިއުޅޭ އެއްލައްކައަށްވުރެ ގިނަ މީހުންނަކީ 1948 ވަނަ އަހަރު ކުރި އަރަބި އިސްރާއީލުގެ ހަނގުރާމައިގައި މިހާރުގެ ޔަހޫދީންގެ ރަށްތަކާއި ރަށްތަކުން ދުރުކުރި ފަލަސްތީނުގެ ދަރިކޮޅުގެ މީހުންނެވެ.
ޖަބާލިޔާއަކީ ގާޒާގައި އޮންނަ އެންމެ ބޮޑު, އަދި ދުވަސްވީ ރެފިއުޖީ ކޭމްޕެވެ. އެ ސަރަޙައްދުގައި ފަލަސްތީނުގެ 100,000އަކަށްވުރެ ގިނަ ރެފިއުޖީން ދިރިއުޅެ އެވެ.
ޔަހޫދީންގެ ސިފައިން ޖަބަލިއާ ކޭމްޕަށް ވަދެފައިވާއިރު، އެ ސަރަހައްދަށް ހަމަލާތައް ދެނީ މީގެކުރިން ގާޒާގެ އުތުރަށް ދިން ހަމަލާތަކަށްވުރެ ވަރުގަދަ ކޮށް ކަމަށް އެ ސަރަހައްދުގައި ދިރިއުޅޭ އާންމުން ބުނެ އެވެ.
ރަފަހްގައި ހުންނަ ކުވައިތު ހަސްފަތާލުގެ ޑިރެކްޓަރު ސާހިބް އަލް-ހަމްސް ވިދާޅުވީ އެ ހަސްފަތާލު ހުސްކުރަން ވެސް ޔަހޫދީ ފައުޖުން އަންގާފައިވާ ކަމުގަ އެވެ. ޔަހޫދީ ފައުޖުގެ ރަހުމު ކުޑަ ހަމަލާތަކުގައި ޒަހަމު ކޮށްލާފައިވާ އެތަކެއް ސަތޭކަ ބަލި މީހުން އެ ހަސްފަތާލުގައި މި ވަގުތު ތިބި ކަމުގައި އޭނާ ވިދާޅުވި އެވެ.
މި ހަނގުރާމައިގައި މިހާތަނަށް ގިނަ އަދަދެއްގެ ކުޑަކުދިންނާއި އަންހެނުން ހިމެނޭ ގޮތަށް 35،000 ވަރަކަށް ފަލަސްތީން ރައްޔިތުން މަރުވެފައި ވާއިރު، ގާޒާގެ އުތުރުގެ ސަރަހައްދުތަކަށް ބަނޑަށް ޖެހުމުގެ ހާލަތަކާ ކުރިމަތިވެފައިވާ ކަމަށް އދ.ގެ ވޯލްޑް ފުޑް ޕްރޮގްރާމްގެ ވެރިޔާ ވަނީ ވިދާޅުވެފަ އެވެ.
މިއާ އެކު ވެސް އެންމެ އަސާސީ ހިދުމަތްތައް ގާޒާގެ ރައްޔިތުންނަށް ލިބޭ މިންވަރު މަދުކޮށް ޔަހޫދީން އަންނަނީ ގާޒާގެ އޮޕަރޭޝަން ހުއްޓުމެއް ނެތި ކުރިއަށް ގެންދަމުން ނެވެ. މި ހަރަކާތްތައް ގަތުލުއާންމެއްގެ ގޮތަށް ގިންތި ކުރެވިދާނެ ކަމަށް ބުނެ އދ.ގެ މާހިރުން ވަނީ ތަކުރާރުކޮށް އިންޒާރު ދީފަ އެވެ.
ޔަހޫދީން ދެމުންދާ ހަމަލާތަކުން ސަލާމަތްވާން، ޕިކަޕަކަށް މުދާތައް އަރުވައިގެން ރަފަހް ދޫކޮށް ދަނީ. --ފޮޓޯ: އޭއެފްޕީ
ރަފަހްގައި ހުންނެވި އިންސާނީ އެހީގެ ކަންކަން ވިލަރެސްކުރާ އދގެ އިދާރާ (އޯސީއެޗްއޭ)ގެ އިސް އޮފިޝަލް, ޖޯރްޖިޔޯސް ޕިތްރޯޕަލީސް ވިދާޅުވީ ރަފަހްގައި ތިބި ރައްޔިތުން އެހެން ސަރަހައްދަކަށް ބަދަލުވުމަށް އެހީތެރިކަން ފޯރުކޮށްދިނުމަށް ބޭނުންވާ އިންސާނީ އެހީގެ ސާމާނު ނެތް ކަމުގަ އެވެ. އަދި, އެތަކެއް ހާސް ބަޔަކު ބަދަލު ކުރެވޭނެ ގޮތެއް ވެސް ނެތް ކަމުގައެވެ.
ހަމަލާތައް ވަގުތުން ހުއްޓާލައި، އިންސާނީ އެހީ ފޯރުކޮށްދިނުން އަވަސް ނުކޮށްފި ނަމަ ގާޒާގައި އިންސާނީ ބޮޑު ކާރިސާއެއް ކުރިމަތިވާނެ ކަމުގެ އިންޒާރު އދ. އިން އަންނަނީ ތަކުރާރުކޮށް ދެމުންނެވެ. އަދި ބުނީ, ގާޒާގައި ހައިހޫނު ކަމާ ކުރިމަތިލާން ޖެހިފައިވާ މީހުންގެ އަދަދު މިލިޔަނަކަށް އުފުލިފައިވާ ކަމުގަ އެވެ.
