ކުޅުދުއްފުށީގެ ސަރުކާރު 3 ސްކޫލަށް މިއަހަރު ދިނުމަށް ކަަނޑައަޅާފައިވާ "ސްކޫލް ގްރާންޓް" ހަވާލުކުރުމުގެ އެއްބަސްވުމުގައި މިއަދު ވަނީ ސޮއިކޮށްފައި އެވެ. އެގޮތުން މިއަދު 3 ސްކޫލަކަށް ހަދިޔާކޮށްފައިވާ ފައިސާ ސްކޫލްތަކުން ހުށަހަޅާފައިވާ ޕްރޮޕޯސަލްގައި ހިމެނޭ ކަންކަން ހާސިލްކުރުމަށް ދީފައިވާ ކަމަށް ކައުންސިލުން ބުންޏެވެ.
ކުޅުދުއްފުށީ ސިޓީ ކައުންސިލުން ބުނީ ސްކޫލް ގްރާންޓް ތައާރަފްކުރުމުގެ ބޭނުމަކީ ކުޅުދުއްފުށީގެ ސްކޫލްތަކުގެ ފެންވަރު ރަނގަޅުކުރުމާއި ވަސީލަތްތައް ތަރައްގީކުރުމާއި އަދި ދަރިވަރުންގެ ކުރިއެރުމަށް ސްކޫލްތަކުން ހިންގަމުން އަންނަ ހަރަކާތްތަކަށް އެހީތެރިވުމެވެ. މީގެ އިތުރުން ސްކޫލްތަކުގެ ޕީޓީއޭއިން ސްކޫލްގެ ތަރައްގީއަށް ފަންޑް ހޯދުމަށް ކުރަމުން އަންނަ މަސައްކަތްތައް ފާހަގަކޮށް އެފަދަ މަސައްކަތްތަކަށް އެއްބާރުލުންދީ އެހީތެރިކަން ފޯރުކޮށް ދިނުމަކީ ވެސް ގްރާންޓް ތައާރަފްކުރުމުގެ މުހިއްމު ބޭނުމެއްކަމަށް އެ ސިޓީ ކައުންސިލުން ބުންޏެވެ.
ކުޅުދުއްފުށީ ސިޓީ ކައުންސިލް އިން 2022 ވަަނަ އަހަރު ހުށަހެޅި ސްކޫލް ގްރާންޓްގެ ދަށުން އެއިރު ވަނީ ކޮންމެ ސްކޫލަކަށް 50،000 ރުފިޔާަ ދޫކޮށްފަ އެވެ.
ކުޅުދުއްފުށީ ސިޓީގައި ހިންގަމުންދާ ސަރުކާރު ސްކޫލްތަކުގެ ޕީ.ޓީ.އޭ އިން ސްކޫލްތަކުގައި ހިންގާ މަޝްރޫއުތަކާއި ހަރަކާތްތަކަށް މާލީ ގޮތުން އެހީތެރިކަން ފޯރުކޮށް ދިނުމަށް ކުޅުދުއްފުށީ ސިޓީ ކައުންސިލުން އެކުލަވާލައިފައިވާ "ސްކޫލް ގްރާންޓް ޕްރޮގްރާމްގެ އުސޫލު" ފާސްކޮށްފައި ވަނީ ކުޅުދުއްފުށީ ސިޓީ ކައުންސިލްގެ 4 ވަނަ ދައުރުގެ 50 ވަނަ އާންމު ބަދަލުވުމުގަ އެވެ.
