ދައުލަތުގެ މީޑިއާގެ ޕްރޮގްރާމެއްގައި ވާހަކަ ދައްކަވަމުން ޓްރާންސްޕޯޓް މިނިސްޓްރީގެ ނައިބު އަލީ މުހައްމަދު ވިދާޅުވީ މިނިސްޓްރީން މީޓަރު ޓެކްސީ ތައާރަފުކުރަން ޖެހުނީ ގްރޭޓާ މާލެ ސަރަހައްދުގައި ހިމެނޭ ގުޅީފަޅު، ތިލަފަޅު، ވިލިމާލެ، މާލެ އަދި ހުޅުމާލޭގެ ދެ ފިޔަވަހި ގުޅިގެންދާއިރު، ހުރިހާ ތަނަކަށް ކުރާ ދަތުރުތަކުގެ އަގުތައް ކަނޑައެޅުމުގެ ބަދަލުގައި ޓެކްސީގެ އަގުތަކުގެ މައްސަލައަށް ޖުމްލަ ހައްލެއް ލިބޭނެތީ ކަމަށެވެ.
މީޓަރު ޓެކްސީ ތައާރަފުކުރެވެމުން ލިބޭ އަނެއް ލުއިފަސޭހައަކީ ބޭރުގެ އެހެން ގައުމުތަކެކޭ އެއްގޮތަށް ހިދުމަތް ހޯދާ ކަސްޓަމަރަށް ދަތުރުކުރި ދުރުމިނާއި އެކަމަށް ހޭދަވި ވަގުތާ އެއްޗެހި އެނގުން ކަމުގައި އޭނާ ވިދާޅުވި އެވެ. އަލީ ވިދާޅުވެފައި ވަނީ އެ ބޭނުމަށް ޓެކްސީތަކުގައި މީޓަރު ހަރުކުރެވޭނީ ކަސްޓަމަރުންނަށް ފެންނާނެ ގޮތަށް ކަމަށެވެ.
މީޓަރު ޓެކްސީ ތައާރަފު ކުރުމުން ޑްރައިވަރުންނަށާއި ޓެކްސީގެ ހިދުމަތް ހޯދާ ފަރާތްތަކަށް ވެސް އިތުރު ލުއިފަސޭހަތަކެއް ލިބިގެންދާނެ ކަމަށް އަލީ ވިދާޅުވި އެވެ. ކޮންމެ ތަނަަކަށް ވަކި އަގެއް ކަނޑައަޅައިގެން އެކަން ކުރުމަކީ ފަސޭހަކަމެއް ނޫން ކަން ފާހަގަކުރައްވާ އަލީ ވިދާޅުވި ގޮތުގައި މިނިސްޓްރީގެ ވިސްނުމަކީ ކަންކަން ނިމިގެންދާއިރު ޓެކްނޮލޮޖީގެ ތެރެއިން ކަންކަން ކުރެވޭނެ ގޮތް ފަހިކުރުން ކަމުގަ އެވެ. އެގޮތުން މީޓަރު ޓެކްސީ ތައާރަފުކުރުމުގެ މަސައްކަތް ނިމޭއިރު ޑާޓާތައް އެއްކުރެވި މައުލޫމާތު ބަލަހައްޓަން ފަސޭހަވާނެ ކަމަށް އޭނާ ވިދާޅުވި އެވެ.
އަލީ ވިދާޅުވީ ޓެކްސީތަކުގައި މީޓަރު ހަރުކުރުމަށް ދިރާސާއެއް ކުރެވި، ކަމާގުޅޭ ފަރާތްތަކާ ބައްދަލުކޮށް އެ ދިރާސާގެ ހޯދުންތައް ހިއްސާކުރެެވިފައިވާ ކަމަށެވެ. އޭގެ އިތުރުން ޓެކްސީ ސެންޓަރުތަކާއި ޓެކްސީ ޑްރައިވަރުންނާ އަދި ޓެކްސީ އެޕްތައް ގެންގުޅޭ ފަރާތްތަކާ ވެސް ބައްދަލުކުރެވިފައިވާ ކަމަށް އަލީ ވިދާޅުވި އެވެ. އެ ފަރާތްތަކުގެ އެއްބާރުލުން ލިބެމުން އަންނަކަން އަލީ ފާހަގަކުރެއްވި އެވެ.
