ދިވެހި ފުލުހުންގެ ހިދުމަތާއި ޔޫއެންއޯޑީސީ ގުޅިގެން "ޓްރެއިނިންގ އޮން ސްޓެންތެންގ ކެޕޭބިލިޓީސް ޓު ޑިސްޓްރަޕްޓް މެރިޓައިމް ކްރައިމްސް އޭޒް ރިލޭޓެޑް ޓު ޓެރަރިސްޓް ތްރެޓްސް"ގެ ނަމުގައި ކުރިއަށް ގެންދިޔަ އެ ޕްރޮގްރާމް ނިންމުމަށް އިއްޔެ ބޭއްވި ރަސްމިއްޔާތު ޝަރަފުވެރިކޮށްދެއްވީ މެރިން ޕޮލިސްގެ ހެޑް، ޗީފް ސުޕްރިންޓެންޑެންޓް އޮފް ޕޮލިސް އިބްރާހީމް އަދުނާން އަނީސްއެވެ.
މެއި 13 އިން 15 އަށް ދޫނިދޫގައި ކުރިއަށް ގެންދިޔަ އެ ތަމްރީނު ޕްރޮގްރާމުގައި، ކަނޑުމަތީގައި ހިންގާ ނިރުބަވެރިކަމުގެ އަމަލުތައް ހުއްޓުވުމާއި ދެނެގަތުމާއި، އެފަދަ ކަމެއް ހިނގައިގެން އުޅޭ ސަރަހައްދަށް ވަދެ ނުކުތުމުގައި އަމަލުކުރަންޖެހޭ ގޮތްތަކުގެ މައުލޫމާތު ހިއްސާކޮށް ތަމްރީނުދީފައިވެ އެވެ.
އަދި އެފަދަ ކުށްތައް ތަހުގީގު ކުރުމުގައި ސަމާލުކަން ދޭންޖެހޭ ކަންކަން ވެސް މިޕްރޮގްރާމުގައި ކިޔަވައިދީފައިވެ އެވެ. މި ތަމްރީނު ޕްރޮގްރާމްގައި ފުލުހުންގެ އެކި ބަހާތަކުން 22 މުވައްޒަފަކު ބައިވެރިވި އެވެ.
ރަސްމިއްޔާތު ޝަރަފުވެރިކޮށްދެއްވައި އިބްރާހީމް އަދުނާން އަނީސް ދެއްކެވި ވާހަކަފުޅުގައި، އެފަދަ ކޯހެއްގެ މުހިންމު ކަމާއި، ކޯހުގެ ބައިވެރިންނަށް އެ ކޯހުން ލިބުނު އިލްމާއި ހުނަރުގެ މައްޗަށް އަލިއަޅުއްވާލެއްވި އެވެ. އަދި ކޯހުގައި ދަސްވި ކަންކަމުގެ ބޭނުން އަމަލީ މައިދާނުގައި ހިފުމަށް އެދިވަޑައިގަތެވެ.
އެ ރަސްމިއްޔާތުގައި، މެރިން ޕޮލިސްގެ ޑިޕާޓްމަންޓުތަކުގެ އިސް އޮފިސަރުންނާއި ޔޫއެންއޯޑީސީގެ ހެޑް އޮފް އޮފީސް އެންރީކޯ ބޮނިންސޭނާ އަދި ކޯހުގެ މުދައްރިބު ކެނެތް އަލްފެރޑޯ ޕެނިންގޓަން ބައިވެރިވެވަޑައިގެންނެވި އެވެ.
