މިނިސްޓްރީގެ އިސް އޮފިޝަލަކު މައުލޫމާތު ދެއްވަމުން ވިދާޅުވީ، ސްކޫލުތައް ހުޅުވޭއިރު ދަރިވަރުންގެ ފޮތްތައް ހަމަކުރުމަށްޓަކައި މިހާރު ވަނީ ފޮތްތައް ފޮނުވަން ފަށާފައި ކަމަށެވެ.
މާލެ ސަރަހައްދުގެ ސްކޫލުތަކުގެ ދަރިވަރުންނަށް ފޮތްތައް ދޫކޮށްފައިވާއިރު، ގއ. އަދި ގދ. އަތޮޅު، އައްޑޫ ސިޓީ އަދި ފުވައްމުލަކަށް ފޮތްތައް ފޮނުވަން ފަށާފައިވަނީ މި ހަފުތާގައެވެ. ބައެއް ސްކޫލުތަކުން ދަރިވަރުންނަށް ވަނީ ސްކޫލު ބަންދުވުމާއެކު ނުވަތަ ރިޕޯޓް ދިނުމުގެ ކުރިން ފޮތްތައް ހަވާލުކޮށްފައެވެ. ނަމަވެސް ސްކޫލު ހުޅުވެން ކައިރިވެފައިވާއިރު، ދަރިވަރުންގެ ޓެކްސްޓް ފޮތްތައް ނުލިބޭ ކަމުގެ ޝަކުވާ ބައެއް ފަރާތްތަކުން ކުރަމުން އެބަދެއެވެ.
އެޑިޔުކޭޝަން މިނިސްޓްރީން ބުނީ ކޮންމެ އަހަރަކުވެސް ދިރާސީ އަހަރު ފެށުމުގެ ކުރިން ދަރިވަރުންނަށް ފޮތްތައް ފޯރުކޮށްދިނުމަކީ މިނިސްޓްރީން ކުރަމުންދާ މުހިންމު މަސައްކަތެއް ކަމަށެވެ. އަދި މިއަހަރުވެސް ސްކޫލު ހުޅުވޭއިރު ހުރިހާ ދަރިވަރުންނަށް ފޮތްތައް ލިބޭނެކަމުގެ ޔަގީންކަން މިނިސްޓްރީން ދީފައިވެއެވެ.
