އިސްލާމިކް މިނިސްޓްރީގެ "އެކްސް" އެކައުންޓުން ވަނީ އިއްޔެގެ ހުކުރު ހުތުބާ ބަންގާޅު ބަހުން އާންމުކުރަން ފެށިކަން ހާމަކޮށްފަ އެވެ. އިއްޔެގެ ހުކުރު ހުތުބާ ހާއްސަ ކޮށްފައި ވަނީ މުދަލު ޒަކާތް ދެއްކުމުގެ މުހިންމުކަމުގެ މައްޗަށެވެ.
މުދަލު ޒަކާތުގެ މައްޗަށް އަލިއަޅުވާލައި ހުތުބާ ބުނީ މުދާވެރިކަމާއި ތަނަވަސް ކަަމަކީ މާތް ﷲ އިންސާނުންނަށް ދެއްވާފައިވާ ނިއުމަތްތަކުގެ ތެރެއިން މަތިވެރި ނިއުމަތެއް ކަމަށެވެ. މުދަލުގެ ހަގީގީ މިލްކުވެރި ފަރާތަކީ މާތް ﷲ ކަމަށާއި އެހެންކަމުން އެކަލާނގެ އަންގަވާފައިވާ ގޮތުގެ މަތިން، އެ މުދަލުން ފަގީރުންނަށާއި މިސްކީނުންނަށާއި ބޭނުން ޖެހިފައިވާ މީހުންނަށް އެހީތެރިވެ، ﷲ ގެ މަގުގައި ހޭދަ ކުރަން ޖެހޭ ކަމަށް ހުތުބާގައި ވަނީ ބުނެފަ އެވެ.
ހުތުބާގައި ބުނެފައި ވަނީ މުސްލިމުންގެ މުދަލުން ޒަކާތަށް ކަނޑައެޅިފައިވާ މިންވަރު ނެރުމަކީ އިސްލާމްދީނުގެ ރުކުނެއް ކަމުގައިވީއިރު، ޒަކާތް ވާޖިބުވެއްޖެ ކޮންމެ މީހަކު، އެމީހެއްގެ މުދަލުން ޒަކާތް ދައްކަން ޖެހޭނެ ކަމަށެވެ. މުދަލު ޒަކާތް ދެއްކުމުގައި ފަރުވާ ކުޑަނުކޮށް ދީނީ މި ވާޖިބު ފުރިހަމަ ގޮތުގައި އަދާކުރުމަށް ވެސް ހުތުބާގައި ވަނީ ގޮވާލާފަ އެވެ.
މިދިޔަ އަހަރުގެ ޑިސެމްބަރު މަހު ހޯމްލޭންޑް މިނިސްޓްރީން ބުނެފައިވާ ގޮތުގައި ރާއްޖޭގައި ތިބި ބަންގްލަދޭޝް މީހުންގެ ރަސްމީ އަދަދު 90،000 އަށް އަރާ ކަމުގަ އެވެ. އެ މިނިސްޓްރީން ވަނީ ރާއްޖޭގައި ގަވާއިދާ ހިލާފަށް އުޅޭ ބިދޭސީން ނިޒާމުގެ ތެރެއަށް ގެނައުމަށް "އޮޕަރޭޝަން ކުރަނގި" ނަމުގައި ހާއްސަ އޮޕަރޭޝަނެއް ފަށާފަ އެވެ.
