ހުކުރު ދުވަހު ބެންކޮކްގައި ބޭއްވި ފީފާގެ ކޮންގްރެސްގައި މެމްބަރު ޖަމިއްޔާތަކުން ބްރެޒިލަށް ތާއީދުކޮށް 119 ވޯޓު ދިން އިރު ޔޫރަޕް ބިޑަށް ލިބުނީ 78 ވޯޓެވެ. މިއީ ދެކުނު އެމެރިކާގެ ގައުމަކުން އަންހެން ވޯލްޑް ކަޕެއް ބާއްވާ ފުރަތަމަ ފަހަރެވެ.
"ބްރެޒިލް އަށް ސާބަސް،" ފީފާގެ ރައީސް ޖިއާނީ އިންފަންޓީނޯ ވިދާޅުވި އެވެ.
ދެ ބިޑުން ވެސް ހޯސްޓިން ކްރައިޓީރިއާ ފުރިހަމަވި ނަމަވެސް ފީފާގެ ބިޑް އިވެލުއޭޝަން ރިޕޯޓުގައި ދަނޑުތަކާއި އެކޮމޮޑޭޝަން، ފޭން ޒޯން އަދި ދަތުރުފަތުރު ފަދަ ދާއިރާތައް ހިމެނޭ ޓެކްނިކަލް ކަންކަމުގައި ބްރެޒިލުން ވަނީ ކުރި ހޯދާފަ އެވެ.
އެމެރިކާ އާއި މެކްސިކޯއިން 2031 ވަނަ އަހަރު މުބާރާތަށް ބިޑް ކުރުމަށް ފޯކަސް ކުރާނެ ކަމަށް ބުނެ އޭޕްރީލް މަހު ވަނީ 2027 ވަނަ އަހަރުގެ އަންހެނުންގެ ވޯލްޑްކަޕްގެ ބިޑް އަނބުރާ ގެންގޮސްފައެވެ.
ފުރަތަމަ ފަހަރަށް އަންހެން ވޯލްޑްކަޕް ބްރެޒިލްގައި ހޯސްޓް ކުރުމުގެ ފުރުސަތު ލިބުން އިރު، ބްރެޒިލުން ފިރިހެން ވޯލްޑް ކަޕް ހޯސްޓްކޮށްފައިވަނީ 1950 ވަނަ އަހަރާއި 2014 ވަނަ އަހަރު އެވެ.
