އެމެރިކާގެ ދިފާއީ ވުޒާރާ ޕެންޓްގަންއިން ބުނާ ގޮތުން، ބަނދަރު މެދުވެރިކޮށް ފުރަތަމަ ޝިޕްމަންޓައް ޣައްޒާއަށް މިހާރު ވަނީ އެތެރެކޮށްފަ އެވެ. ޕެންޓަގަނުން ރާވާފައި އޮތް ގޮތަށް ޣައްޒާއަށް އެހީ ވެއްދޭ ނަމަ ދުވާލަކު 150 ލޮރީ ބަރާކޮށް މުދާ އެތެރެކުރެވޭނެ ކަމަށްވެސް އޮފިޝަލުން ވިދާޅުވެ އެވެ.
ވަގުތީ ބަނދަރު އޮޕަރޭޝަނަށް އައި ކަމުގައިވީ ނަމަވެސް އެއްގަމު މަގުން އެހީ ވެއްދުން އަދިވެސް މާ ފަސޭހަވެފައި އަވަސް ވާނެ ކަމަށް އދ. އިން ވަނީ ބުނެފަ އެވެ.
ރަފަހް ހުރަސް ބަންދުކުރުމުން ޣައްޒާގައި ބަނޑުހައިހޫނުކަން އިތުރުވާނެ ކަމަށް އދ.އިން ބުނަމުން އައި ނަމަވެސް އިންސާނީ އެހީ ފޯރުކޮށްދޭ އިތުރު ދެ މަގު ކަމަށްވާ، ގާޒާއާއި އިސްރާއިލު ގުޅޭ ކަރީމް އަބޫ ސާލިމް އަދި އީރޫޒް ސަރަހައްދީ ރޮނގުވެސް އިސްރާއީލުން ވަނީ ބަންދުކޮށްފަ އެވެ.
ކަނޑު މަގުން ގާޒާއަށް އެހީ ވަންދަން ފެށުމަކީ ލިބުނު ލުޔެއް ކަމަށް އެހީ ފޯރުކޮށްދޭ ޖަމާއަތްތަކުން ބުނެ އެވެ. ގާޒާއަށް ކަނޑު މަގުން ވައްދާ އެހީ ބެހުމަށް ހަމަޖެހިފައި ވަނީ ގުދަންތަކަށް ވެއްދުމަށް ފަހު އެހީ ފޯރުކޮށްދޭ ޖަމިއްޔާތަކާ ގުޅިގެންނެވެ. މައިގަނޑު ގޮތެއްގައި ވޯލްޑް ފުޑް ޕްރޮގްރާމް އިންނެވެ.
އެމެރިކާގެ އަސްކަރިއްޔާ އިން މި ފާލަން ހެދުމުގެ މަސައްކަތް ފައްޓާފައި ވަނީ މިއަހަރުގެ މާޗު މަހު
މިދިޔަ އަހަރުގެ އޮކްޓޯބަރު ހަތް ވަނަ ދުވަހުން ފެށިގެން ހަމާސް ނައްތާލުމުގެ ނަމުގައި އިޒްރޭލުން ހުއްޓުމެއްނެތި ދެމުންދާ ހަމަލާތަކުގައި، މިހާތަނަށް 35،600 އަށް ވުރެ ގިނަ ފަލަސްތީނުގެ ރައްޔިތުން ވަނީ ޝަހީދުވެފަ އެވެ.
ގާޒާގައި ގާތްގަނޑަކަށް 2.2 މިލިއަން ފަލަސްތީނު ރައްޔިތުން ވަނީ ކާބޯތަކެއްޗާއި ބޯހިޔާވަހިކަމާއި އެހެނިހެން އެހީތެރިކަމަށް ޖެހިފަ އެވެ. އޭގެ ތެރެއިން، 56 ޕަސަންޓަކީ އަންހެނުންނާއި ކުޑަކުދިން ކަމަށް އދ. އިން ވަނީ ބުނެފަ އެވެ.
