މިއަދު ބޭއްވި ނޫސްވެރިންގެ ބައްދަލުވުމެއްގައި އެގުރިކަލްޗަރ މިނިސްޓަރ އައިޝަތު ރަމީލާ ވިދާޅުވީ، ދަނޑުވެރިންނަށް ފައިދާވާނެ ގޮތަށް ކަންތައްތައް މަގުފަހިކޮށްދިނުމާއި، ދަނޑުވެރިިކަން ކުރިއެރުވުމަށްކުރާ ކަންތައްތަކަކީ ވަރަށް އިސް ދައުރެއް އަދާ ކުރާ ކަންތައްތައް ކަމަށެވެ.
އެގްރިކަލްޗަރ މިނިސްޓްރީގެ ފަރާތުން ހުޅުވާލާ މެޗިންގ ގްރާންޓް ސްކީމަކީ، އިންޓަރނޭޝަނަލް ފަންޑް ފޮރ އެގްރިކަލްޗަރަލް ޑިވޮލަވްމަންޓް (އިފާޑް) އާއި ގުޅިގެން ކުރިއަށްގެންދާ، މޯލްޑިވްސް އެގްރިބިޒްނަސް ޕްރޮގްރާމް (މެޕް) ގެ ދަށުން ދަނޑުވެރިންނަށް މާލީ އެހީތެރިކަން ފޯރުކޮށްދިނުމަށް މިއަހަރުގެ އޭޕްރިލް މަހުގެ ތެރޭގައި ފިނޭންސް މިނިސްޓްރީ އާއި އެސްޑީއެފްސީ އާއި އެކު އެގްރިކަލްޗަރ މިނިސްޓްރީ އިން ވެފައިވާ އެއްބަސްވުމެއްގެ ދަށުން ތައާރަފްކުރާ 15 މިލިއަން ރުފިޔާގެ މެޗިން ގްރާންޓް ސްކީމެއް ކަމަށް މިނިސްޓަރ ރަމީލާ ވިދާޅުވި އެވެ.
ދަނޑުވެރި މަންފާގެ ސްކީމް އަމާޒުކުރަނީ މޯލްޑިވްސް އެގްރިބިޒްނަސް ޕްރޮގްރާމްގެ ހަރަކާތްތައް ކުރިއަށްދާ ހއ ހދ އަދި ށ އަތޮޅުން ހޮވާލެވިފައިވާ 26 ރަށުގެ ދަނޑުވެރިންގެ އިތުރުން ދަނޑުވެރިކަމުގައި ހަރަކާތްތެރިވާ އެންޖީއޯތަކުގެ އިތުރުން ކުދި އަދި މެދު ފަންތީގެ ވިޔަފާރިތަކާއި ކޯޕަރޭޓިވް ސޮސައިޓީތަކަށް ކަމަށްވެސް ރަމީލާ ވިދާޅުވި އެވެ.
ރަމީލާ ވިދާޅުވީ، މެޕް ޕްރޮޖެކްޓްގެ މައިގަނޑު އެއް މަސައްކަތުގެ ތެެރެއިން 12 ރަށެއްގައި ގްރީން ހައުސް އެޅުމަށް ވަނީ ހަމަޖެހިފައެވެ. ގްރީން ހައުސްތައް އަޅާ އެ ގްރީން ހައުސްތަކުގައި ކޮކޯޕީޓް ބޭނުންކޮށްގެން ކިއުކަމްބަރ އާއި މެލަން ހައްދާނެ ގޮތުގެ ޓެކްނިކަލް ތަމްރީންތައް ކުރިއަށްގެންދާ ކަމަށެވެ.
މީގެ އިތުރުން ރަމީލާ ވިދާޅުވީ، ދަނޑުވެރިކަމުގެ ތަމްރީން ޕްރޮގްރާމްތަކުގެ މައިގަނޑު ބޭނުމަކީ ތިމާވެއްޓާ ރައްޓެހި، ކްލައިމެޓް ސްމާޓް، ދެމެހެއްޓެނިވި ދަނޑުވެރިކަން ކުރިއަރުވާ ޒަމާނީ ޓެކްނޮލޮޖީ ބޭނުންކޮށްގެން ދަނޑުވެރިކަން ކުރުމަށް ދަނޑުވެރިން ޝައުގުވެރިކޮށް އަހުލުވެރި ކުރުވުން ކަމަށެވެ.
