
މާލޭގެ ހަވީރީ ހިނގުމުގައި ކުނި ބަހައްޓަމުންދިޔަ މީހެއްގެ ވީޑިއޯ ކައުންސިލުން އެކްސްގައި ހިއްސާކޮށް، އެ މީހާ ހޯދުމުގެ މަސައްކަތް ފުލުހުންނާ ގުޅިގެން ކުރަމުންދާކަމަށް މާލެ ސިޓީ ކައުންސިލުން ބުނެފިއެވެ.
މަގުމައްޗަށް ކުނި އަޅަމުންދާ ފަރާތްތައް ފާހަގަކުރެވޭނަމަ، އެފަދަ ފަރާތްތަކުގެ ފޮޓޯ އަދި ވީޑިއޯ ކައުންސިލްގެ ނަންބަރު 9341144 އަށް ވައިބާ ކޮށްދިނުމަށް ކައުންސިލުން އެދިފައިވެއެވެ. މާލެ ސިޓީ ސާފުތާހިރު ތަނަކަށް ހެދުމަށް ކުރާ މަސައްކަތްތަކުގައި ރައްޔިތުންގެ އެއްބާރުލުން ބޭނުންވާކަމަށް ކައުންސިލުން ބުނެފައިވެއެވެ.
މީގެ ކުރިންވެސް ސިޓީ ކައުންސިލުން ވަނީ މަގުމަތީގައި ކުނި ނުބެހެއްޓުމަށް އިލްތިމާސް ކޮށްފައެވެ. މިހާރު ކައުންސިލުން ދަނީ މަގަށް ކުނި އަޅާ މީހުން 500 ރުފިޔާއިން ޖޫރިމަނާކޮށް، އެމީހުންގެ ވީޑިއޯތައް ސޯޝަލް މީޑިއާގައި އާންމުކުރަމުންނެވެ. މިކަމަކީ މާލެ ސިޓީ ސާފުކުރުމަށް ކައުންސިލުން ކުރަމުންދާ މަސައްކަތްތަކުގެ ތެރެއިން އެއް މަސައްކަތެވެ.