ގއ. ނިލަންދޫ ކޯޓުން މި ހުކުމް އިއްވާފައިވަނީ އެ ރަށު ފެހިފަރުދާގެ، ނާޒިމް އަލީގެ މައްޗަށެވެ.
ކޮވިޑްގެ ދުވަސްވަރު އާމްދަނީއަށް ނުރަނގަޅު އަސަރުތައް ކުރި މީހުންނަށް ސަރުކާރުން އެހީވުމުގެ ގޮތުން ދޫކުރި އިންކަމް ސަޕޯޓް އޮޅުވާލައިގެން މި މިހާ ނެގިކަމަށް ކޯޓް ހުކުމުގައިވެއެވެ. އަދި މީނާ މި ފައިސާ ނަގާފައިވަނީ 2020 ވަނަ އަހަރުގެ ޖުލައި، އޮގަސްޓް އަދި ސެޕްޓެމްބަރު މަހުއެވެ. ކޮންމެ މަހަކަށް 5000 ރުފިޔާގެ މަގުން ޖުމަލް 15000 ރުފިޔާ މިމީހާ ވަނީ ނަގާފައެވެ.
މީނާ މި ފައިސާ އޮޅުވާލައިގެން ނެގިކަން އެނގުމުން އެފައިސާ ދެއްކުމަށް އެތައް ފަހަރަކު ކަމާއި ގުޅޭ އިދާރާތަކުން އެންގިއެވެ. ދައުލަތުން މި މައްސަލާގައި ކޯޓަށް ދިޔައީ އޭނާ ފައިސާ ނުދެއްކުމުންނެވެ.
ކޯޓުގައި މައްސަލަ ފެށުމުން ދައުވާއަށްް އިންކާރުކޮށް ދައުލަތުން ފައިސާ ލިބިފައި ނުވާކަމަށް މިމިހާ ބުންޏެވެ. އެހެންނަމަވެސް ހެކި ތައް ހުށައެޅުމުން ފަހުން އޭނާ ވަނީ އެ ފައިސާ ލިބުނުކަމަށް އިއުތިރާފުވެފައެވެ.
މި މައްސަލަ ނިންމާ ނިލަންދޫ ކޯޓުން އިއްވި ހުކުމުގައި ވަނީ މި ފައިސާ ފަސް މަސްދުވަހުގެ ތެރޭގައި ދައްކާ ހަލާސްކުރުމަށް ނާޒިމް އަލީގެ މައްޗަށް އަމަރުކޮށްފައެވެ. ކޯޓުން މި ގޮތަށް ނިންމާފައިވަނީ ނާޒިމް އެގޮތަށް އެދުމުންނެވެ. އޭނާ އެދުނީ މަހަކު 3000 ރުފިޔާ ދައްކާ ފައިސާ ހަލާސްކުރާގޮތަށް މައްސަލަ ނިންމާ ދިނުމަށެވެ.
